İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 398 Hüküm no: 403 Orijinal metin no: [105b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş Çavuş b. İsmail’in Akşemseddin mahallesindeki evini Rukiye bt. Abdullah’a sattığı Mahmiye-i İstanbul’da Akşemseddin mahallesinde sâkin Derviş Çavuş b. İsmail nâm kimesne meclis-i şer‘-i şerîf-i enverde Rukiye bt. Abdullah nâm hâtunun zevci ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Halil Efendi b. Mustafa, Ahmed Beşe b. Abdullah nâm kimesneler şehâdetleri [ile] şer‘an sâbit olan Mehmed Beşe b. Abdullah mahzarında ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Sefer mülkü ve üç tarafdan mahalle-i mezbûre imâmına meşrûta odalar ile mahdûd fevkānî iki bâb oda ve bir sofa ve bir kiler ve tahtânî bir bâb oda ve bir matbah ve bi’r-i mâ ve iki kenîf ve cüneyne ve havluyu müştemil mülk menzilimi, müvekkile-i mezbûre Rukiye Hâtun’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile iki yüz seksen beş esedî guruşa bey‘ ve teslîm ol dahi ber vech-i muharrer iştirâ ve tesellüm ettiğinden sonra semeni olan meblağ-ı mezbûr iki yüz seksen beş esedî guruşu vekîl-i mezkûr Mehmed Beşe yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūme Rukiye Hâtun’un mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde [106a] gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Abdullah Efendi el-İmâm, Şemseddinzâde Mehmed Efendi, Mustafa Efendi b. Şemseddin, Hamza Odabaşı b. Ali, Hasan Beşe b. Abdullah, Mehmed b. Rıdvan, Mehmed b. Mustafa, Yusuf b. Abdullah, Mustafa b. Durak.