İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 399 Hüküm no: 404 Orijinal metin no: [106a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayas Paşa’nın neslinden olup vakfının mütevellisi olan Tahir Mehmed Ağa’nın tevliyet davasında aynı aileden Ali Çelebi b. Ahmed ile anlaştığı Merhûm Ayas Paşa nâm sâhibü’l-hayrın evlâdından olup vilâyet-i Rumeli’nde Vize Saray kazâsında kasaba-i Fındıklı’da vâki‘ evkāfına berât-ı pâdişâhî ile hâlâ mütevellî olan fahrü’l-akrân ve’l-eşbâh Tahir Mehmed Ağa tarafından husûs-ı âti’l-beyâna vekîl olduğu etbâ‘ından Halil Beşe b. Ahmed ve İbrahim Beşe b. el-Hâc Mustafa nâm kimesneler şehâdetleri ile şer‘an sâbit olan fahrü’l-akrân el-Hâc Abdullah b. Osman nâm kimesne meclis-i şer‘-i şerîfde yine merhûm-ı mezbûrun evlâdından olan Ali Çelebi b. Ahmed nâm kimesne mahzarında bi’l-vekâle ikrâr ve takrîr-i kelâm edip evlâd-ı vâkıfdan olup bundan akdem mütevellî olan Mehmed Bey nâm kimesne fevt oldukda, müvekkilim mûmâ-ileyh Tahir Mehmed Ağa evlâd-ı vâkıfın aslah ve erşedi olmağla evkāf-ı mezbûreye berât-ı pâdişâhî ile mütevellî nasb ve ta‘yîn olundukdan sonra mezbûr Ali Çelebi dahi evlâd-ı vâkıfdan olmağla tevliyyet-i mezkûremi da‘vâ etmekle beynlerinde nizâ‘-i küllî vâki‘ olmuşdu. El-hâletü hâzihî müvekkilim mûmâ-ileyh Tahir Mehmed Ağa evkāf-ı mezbûrenin gallesini her sene cem‘ ve tahsîl edip vezâif-i mu‘ayyene ve mesârif-i mühimmeye sarf ettiklerinden bâkī kalan fazlayı ber mûceb-i şart-ı vâkıf müvekkilim mûmâ-ileyh [ile] mezbûr Ali Çelebi ale’s-seviyye beynlerinde taksîm etmek irâde [ve] rızâ [ve] kavl ü ittifâk ve ahd ü mîsâk eylediler dedikde gıbbe’t-tasdîki’ş-şer‘î ve’t-tahkīki’l-mer‘î, mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Fahrü’l-a‘yân Süleyman b. Derviş Ağa, Zahrü’l-akrân Silahdâr Mustafa Ağa b. Abdullah, İsmail Efendi b. Mehmed, es-Seyyid Hasan Çelebi b. es-Seyyid Mehmed, Mehmed Bey b. Sefer, Mehmed Beşe b. Hüseyin, Veyis b. Muslu, Halil b. Ahmed, Musa b. İbrahim, İbrahim b. Mustafa, Mehmed Beşe b. ( ), Ali Kethüdâ ve gayruhüm.