İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 400 Hüküm no: 405 Orijinal metin no: [106a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Ağa b. Mustafa’nın Hasan b. Ali’den borç aldığının kefillerle beyanı Husûs-ı âti’l-beyânın mahallinde tahrîr iltimâs olunmağın savb-ı şer‘den Mevlânâ İbrahim Efendi b. Şaban irsâl olunup ol dahi fahrü’l-akrân Hasan Efendi b. Ali nâm kimesnenin mahmiye-i İstanbul’da Mustafa Bey mahallesinde sâkin olduğu menziline varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde mahmiye-i mezbûrede Hobyar mahallesi sâkinlerinden fahrü’l-akrân Hüseyin Ağa b. Mustafa meclis-i ma‘kūd-ı mezbûrda, bâ‘is-i hâze’l-kitâb mezbûr Hasan Ağa mahzarında ikrâr ve takrîr-i kelâm edip mezbûr Hasan Ağa beş bin esedî guruşu bana ikrâz ve teslîm ben dahi yedinden istikrâz ve kabz ve tesellüm eylediğimden sonra târih-i kitâbdan iki yüz on gün tamâmına değin müeccel ve mev‘ûd olmak üzre bir cevâhir bilezik ve bir cevâhir kuşağını bi safkatin vâhidetin beş yüz esedî guruş şurût-ı müfsideden ârî bey‘-i kat‘î ile bana bey‘ ve teslîm ben dahi ber vech-i muharrer yedinden iştirâ ve kabûl eyledim hâlâ meblağ-ı mezbûr beş bin esedî guruş ile semen-i mezkûr beş yüz esedî guruş [106b] min haysi’l-mecmû‘ beş bin beş yüz esedî guruş mezbûr Hasan Ağa’ya zimmetinde vâcibü’l-edâ ve lâzımü’l-kazâ deynimdir dedikde gıbbe’t-tasdîki’ş-şer‘î mahmiye-i mezbûrede Davudpaşa mahallesi sâkinlerinden el-Hâc Mustafa Çelebi b. Osman ve Receb Çelebi b. Mustafa ve zikr olunan Hobyar mahallesi sâkinlerinden mezbûr Hasan Ağa’nın babası Mustafa Ağa b. Abdullah nâm kimesneler meblağ-ı mezbûr beş bin beş yüz esedî guruşa târih-i mezbûr tamâmına değin tarafeynden emir ve kabûlü hâviye kefâlet-i sahîha-i şer‘iyye ile her biri kefîl olduklarından sonra husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Mahmud b. ( ) ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Hasan el-İmâm, diğer Mehmed Efendi b. Himmet el-İmâm, el-Hâc Ahmed Odabaşı b. Hasan, Mehmed Beşe b. Abdullah, Sâlih Çelebi b. Hasan, Mehmed Çelebi b. Abdullah, Mehmed Çelebi b. Receb, Ebûbekir b. Abdullah, Mehmed b. Abdullah, Mehmed Bey b. Ali, el-Hâc Mustafa b. Mehmed ve gayruhüm mine’l-hâzırûn.