İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 401 Hüküm no: 406 Orijinal metin no: [106b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avlonyalı Mellah Koçi v. Göko’nun Edirnekapısı’ndaki fırında bulunan hissesini Kiro v. Nikola’ya sattığı Vilâyet-i Rumeli’nde Avlonya sancağında Ereğli kazâsına tâbi‘ Maraste nâm karyeden olup mellâh tâ’ifesinden Koçi v. Göko nâm zimmî meclis-i şer‘-i şerîfde bâ‘is-i hâze’s-sifr Kiro v. Nikola nâm zimmî muvâcehesinde ikrâr ve takrîr-i kelâm edip mahmiye-i İstanbul’da Edirnekapısı dâhilinde ekmekçi fırını içinde mevcûd ve ma‘hûd olup beynimizde ma‘lûm bârgir ve sâir âlâtının sekiz sehimden bir sehimi benim hakkım ve mülküm olmağla hisse-i mezkûremi iki bin akçeye tarafeynden îcâb ve kabûlü hâvî bey‘-i kat‘î ile mesfûr Kiro’ya bey‘ ve teslîm ol dahi ber vech-i muharrer iştirâ ve kabûl ettiğinden sonra semeni olan meblağ-ı merkūm iki bin akçeyi mesfûr Kiro yedinden tamâmen ahz u kabz eyledim ba‘de’l-yevm sâlifü’z-zikr bârgir ve sâir âlâtda olan hisse-i mezkûre mesfûr Kiro’nun mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Kiro v. Kazar, Niko v. Papas, Marko v. Zeno, Ban v. Vana, İstemad v. Zeno Bebek câmi‘i kurbunda, Kir[o] v. Dimo Deniz hamamı ustası, Sebçer? v. Hristo Ortaköy ustası, Yani v. Hristo, Dimo v. Yani ve gayruhüm mine’l-hâzırîn.