İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 401 Hüküm no: 407 Orijinal metin no: [106b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mısırlı Seydî İbrahim b. Kasım’ın alacağı olduğu iddiasıyla Hacı Mustafa b. Ahmed aleyhine açtığı davada iddiasını ispat edemediği Medîne-i Mısr-ı Kahire’de Hân-ı Halil ahâlîsinden olup mahmiye-i İstanbul’da Papasoğlu hanı’nda misâfiren sâkin Seydî İbrahim b. Kasım nâm kimesne meclis-i şer‘-i şerîfde bâ‘is-i hâzihi’l-vesîka el-Hâc Mustafa b. Ahmed nâm kimesne mahzarında üzerine da‘vâ ve takrîr-i kelâm edip mezbûr el-Hâc Mustafa’ya târih-i kitâbdan on bir sene mukaddem cezîre-i Girit’de her biri dokuzar dirhem olmak üzre iki yüz otuz iki riyâlî guruşu bi tarîki’l-mudârebe def‘ ve teslîm mezbûr el-Hâc Mustafa dahi ber vech-i muharrer ahz u kabz edip hâlâ zimmetinde kalmağla suâl olunup meblağ-ı mezbûr iki yüz otuz iki riyâlî guruş ile cihet-i karz-ı şer‘îden dahi zimmetinde hakkım olan üç bin paranın alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan [107a] müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûr yedinden ber vech-i muharrer iki yüz otuz iki riyâlî guruşu ahz u kabz etmeyip ve cihet-i mezkûreden dahi müdde‘î-i mezbûra üç bin para deyni olmayıp elân üzerine red ve zamândan bir nesne lâzım olmadığına mezbûr el-Hâc Mustafa’ya yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle müdde‘î-i mezbûr bilâ-beyyine ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Mehmed Ağa kethüdâ-yı muhzırân, Veli Beşe el-Muhzır ve gayruhüm.