İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 405 Hüküm no: 413 Orijinal metin no: [108b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Şaban’ın Saraç Hüseyin Beşe b. İsa aleyhine açtığı alacak davasında sulh olduğu Mahmiye-i İstanbul’da Yedikule kurbunda Mirahor mahallesi sâkinlerinden Mustafa Çelebi b. Şaban nâm kimesne meclis-i şer‘-i şerîfde bâ‘is-i hâze’l-kitâb sarrâc Hüseyin Beşe b. İsâ nâm kimesne mahzarında ikrâr ve takrîr-i kelâm edip mezbûr Hüseyin Beşe zimmetinde beynimizde ma‘lûm eşyâ semeninden hakkım olan iki yüz guruşu mezbûr Hüseyin Beşe’den bundan akdem taleb ve da‘vâ eylediğimde, ol dahi inkâr etmekle beynimizde nizâ‘-ı küllî vukū‘undan sonra muslihûn tavassut edip mezbûr Hüseyin Beşe ile beynimizde on beş guruş ile bir Kelâmullah üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr on beş guruş ile zikr olunan Kelâmullah’ı mezbûr Hüseyin Beşe yedinden tamâmen ahz u kabz eyledim ba‘de’l-yevm husûs-ı mezbûra müte‘allika da‘vâdan mezbûr Hüseyin Beşe’nin zimmetini ibrâ-i âmm-ı [kātı‘ü’n-]nizâ‘la ibrâ ve iskāt edip ol dahi bedel-i sulh olan meblağ-ı mezbûr on beş guruş ile zikr olunan Kelâmullah’a müte‘allika da‘vâda benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Ahmed b. Abdullah, Mustafa Çelebi b. Abdullah, el-Hâc Ahmed b. Ali, Mehmed b. Receb, Mehmed Çelebi b. Halil, İsmail Çelebi b. Mehmed.