İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 406 Hüküm no: 414 Orijinal metin no: [108b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Mehmed’in babasının terekesi hususunda kardeşi Mustafa ile sulh olduğu Vilâyet-i Rumeli’nde Premedi kazâsına tâbi‘ Dermar nâm karyede sâkin iken bundan akdem vefât eden Mehmed b. Hasan’ın verâseti, zevceteyn-i metrûketeyn Bedirmâh bt. Mehmed ve Sultan bt. Ahmed nâm hâtunlar ile sulbî kebîr oğulları Mustafa ve Osman ve sulbiye kızları Meryem ve Nursafâ ve Zeliha’ya münhasıra olduğu şer‘an sâbit oldukdan sonra mezbûr Osman meclis-i şer‘-i şerîfde müteveffâ-yı mezbûrun terekesine vâzı‘ü’l-[yed] olan bâ‘is-i hâze’l-kitâb mezbûr Mustafa mahzarında üzerine da‘vâ ve takrîr-i kelâm edip babam müteveffâ-yı mezbûrun terekesinden altmış dört sehimden hisse-i şer‘iyyem olan on dört sehim mukābelesinde şerâit-i sıhhat-i sulhü hâvî şurût-ı müfsideden ârî bi tarîki’t-tehârüci’ş-şer‘î nukūd-ı terekeden hissemden ezyed sekiz yüz akçe üzerine mezbûr Mustafa ile sulh olduğumdan sonra mezbûr Mustafa karye-i mezbûrede vâki‘ bir harman yeri ve bir samanhânesini bi safkatin vâhidetin sekiz yüz akçeye bana bey‘ ve mahallinde kabza taslît ve semenini deyni olan bedel-i sulh-ı mezbûra takās, ben dahi iştirâ ve mukāssa ve kabûl eyledim ba‘de’l-yevm tereke-i müteveffâ-yı mezbûra müte‘allika cemî‘ de‘âvîden mezbûr Mustafa’nın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Receb Efendi b. Mehmed, Molla Osman mücâvir, Durmuş b. Hamza, Hasan Beşe b. Mustafa, Hasan Beşe [b.] Mustafa.