İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 406 Hüküm no: 415 Orijinal metin no: [109a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahudi Kobrado v. Abraham’ın Sâlih Beşe b. Mehmed’de olan alacağı konusundaki davada, Sâlih Beşe’nin kalan borcunu ödemesi gerektiği Alman cemâ‘atinden olup mahmiye-i İstanbul’da el-Hâc İsâ mahallesinde sâkin Kobrado v. Abraham nâm yahudi meclis-i şer‘-i şerîfde Sâlih Beşe b. Mehmed mahzarında üzerine da‘vâ ve takrîr-i kelâm edip mezbûr Sâlih Beşe zimmetinde cihet-i deyn-i şer‘îden seksen üç buçuk esedî guruş hakkım olmağla suâl olunup alıverilmesi matlûbumdur dedikde gıbbe’s-suâl mezbûr Sâlih Beşe cevâbında. kaziyye minvâl-i muharrer üzre olduğunu ikrâr, lâkin müdde‘î-i mezbûra ber vech-i muharrer deynim olan meblağ-ı mezbûrun yirmi beş esedî guruşunu târih-i kitâbdan sekiz gün mukaddem müdde‘î-i mezbûra edâ ve teslîm ol dahi yedimden ahz u kabz edip ve bundan akdem müdde‘î-i mezbûra her vakıyyesi on sekizer akçeye olmak üzre altmış dört vakıyye dil peynirimi dokuz buçuk guruş ve on iki akçeye bey‘ ve teslîm ol dahi ber vech-i muharrer iştirâ ve kabûl ve tesellüm ettiğinden sonra semeni olan meblağ-ı mezbûru kendiye deynim olan meblağ-ı merkūmun dokuz buçuk esedî guruş ve on iki akçesine takās, ben dahi mukāssa ve kabûl edip müdde‘î-i mezbûr Kobrado’ya ancak kırk sekiz esedî guruş ile yüz sekiz akçe deynim bâkī kalmışdır deyû müdde‘î-i mezbûru ba‘zı müdde‘âsında def‘le mukābele edicek isre’l-istintâk ve’l-inkâr mezbûr Sâlih Beşe’den def‘-i mezbûrunu mübeyyine beyyine taleb olundukda udûl-i müslimînden olup Neslişah Sultan mahallesi ahâlîsinden Mustafa b. Hasan ve Mehmed b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Sâlih Beşe ber vech-i muharrer deyni olan meblağ-ı mezbûrun yirmi beş esedî guruşunu müdde‘î-i mezbûr Kobrado’ya târih-i kitâbdan sekiz gün mukaddem bizim huzûrumuzda edâ ve teslîm ol dahi yedinden ahz u kabz etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olduğundan sonra mezbûr Sâlih Beşe’den müdde‘î-i mezbûra ber vech-i muharrer altmış dört vakıyye peyniri bey‘ ve teslîm ettiğine dahi beyyine taleb olundukda ityânı için istimhâl etmekle mehl-i şer‘î ile imhâl olunduğundan sonra ikrârı mertebesi olan meblağ-ı bâkī-i mezbûr kırk sekiz esedî ve yüz sekiz akçeyi müdde‘î-i mezbûra edâ ve teslîme mezbûr Sâlih Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Mehmed Ağa kethüdâ-yı muhzırân, Velid Beşe b. ( ) ve gayruhüm mine’l-hâzırîn.