İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 408 Hüküm no: 418 Orijinal metin no: [109b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hanife bt. Yahya’nın Rus asıllı câriyesi Ferah bt. Abdullah’ı hayatta iken azat ettiğinin kızları Hayrünnisa ve Rukiye tarafından ikrarı Mahmiye-i İstanbul’da Ekşikaradut mahallesinde sâkine iken bundan akdem vefât eden Hanife bt. Yahya nâm hâtunun verâseti, li ebeveyn karındaşı Hayrünnisa ve sadriye kızı Rukiye Hanım bt. Ebûbekir nâm hâtunlara münhasıra olduğu şer‘an sâbit ve mütehakkik oldukdan sonra mezbûretân Hayrünnisa ve Rukiye Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân Halil Çelebi b. Süleyman ve Mahmud Çelebi b. Hüseyin nâm kimesneler şehâdetleri ile şer‘an sâbit olan İbrahim Bey b. Mehmed nâm kimesne [meclis-i] şer‘-i şerîfde bi’l-vekâle ikrâr ve takrîr-i kelâm edip müteveffât-ı mezbûre Hanife Hâtun hâl-i hayâtında kendiye rıkkıyyetini mu‘terife olan işbu uzun boylu açık kaşlı ala gözlü Rûsiyyetü’l-asl bâ‘isetü hâze’l-kitâb Ferah bt. Abdullah nâm câriye-i memlûkesini hasbeten lillâhi’l-meliki’l-Hallâk ve taleben li merzâti’r-rabbi’r-Rezzâk malından tahrîr ve i‘tâk ve zümre-i harâir-i asliyyâta idrâc ve ilhâk etmişdi hâlâ mevsûfe-i mezbûre Ferah sâir harâir-i asliyyât gibi hürre olup üzerinde müvekkiletân-ı mezbûretânın alâkaları yoktur dedikde mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi mahalle-i mezbûre el-İmâm, Mehmed Halîfe el-Müezzin, Receb Çelebi b. ( ) câbi, Hüseyin Çelebi b. ( ) el-münâdî, İbrahim Çelebi b. Ahmed, İbrahim Çelebi b. Hasan, Ali Beşe b. Şaban ve gayruhüm mine’l-hâzırîn.