İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 409 Hüküm no: 419 Orijinal metin no: [110a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın, kocasının terekesinden hakkını vermediği iddiasıyla parasına el koyan görümcesi Ayşe b. Mehmed aleyhine açtığı davada sulh oldukları Mahmiye-i İstanbul’da Avratpazarı kurbunda el-Hâc İbrahim mahallesinde sâkin iken bundan akdem vefât eden el-Hâc Mahmud b. Mehmed nâm kimesnenin verâseti, zevce-i metrûkesi Hatice bt. Abdullah ve sulbiye kebîre kızları Ayşe ve Sâliha’ya ve li ebeveyn kız karındaşı diğer Ayşe nâm hâtunlara münhasıra olduğu şer‘an mütehakkik oldukdan sonra zâtı ma‘rifet-i şer‘iyye ile ârifân Ali b. İbrahim ve Ömer Efendi b. el-Hâc Mehmed nâm kimesneler ta‘rîfleri ile mu‘arrefe olan mezbûre Hatice Hâtun meclis-i şer‘de, bâ‘isetü hâzihi’l-vesîka mezbûre diğer Ayşe’nin oğlu ve tarafından husûs-ı âti’l-beyâna vekîl olduğu mezbûrân Ali Çelebi ve Ömer Efendi şehâdetleri ile şer‘an sâbit olan Mehmed Çelebi b. Mustafa mahzarında ikrâr ve takrîr-i kelâm edip bundan akdem mezbûr Ali Çelebi ve mezbûre Sâliha’nın zevci Hasan b. Abdülmennân nâm kimesne ve müvekkile-i mezbûre diğer Ayşe cümlesi benim menzilime gelip sen mûrisimiz müteveffâ-yı mezbûrun terekesinden bir mikdâr akçesin ahz ve ihfâ etmişsin deyû bir beledî yastığım içinde mevcûd olan yetmiş sekiz İngiliz ve yaldız altınımı fuzûlen ahz u kabz eylediklerinden sonra beynlerinde iktisâm edip zikr olunan altının dört yaldız ve on iki İngiliz, cem‘an on altı altını mezbûre diğer Ayşe Hâtun ahz u kabz etmişdi hâlâ mezbûre diğer Ayşe’nin ber vech-i muharrer makbûzu olan meblağ-ı mezbûr on altı altını mezbûre diğer Ayşe’nin oğlu ve vekîli olan merkūm Mehmed Çelebi yedinden tamâmen ahz u kabz eylediğimden sonra husûs-ı mezbûra ve hukūk-ı ma‘lûme ve mechûleye müte‘allika âmme-i de‘âvî ve mütâlebâtdan ben müvekkile-i mezbûre diğer Ayşe Hâtun’un zimmetini ibrâ-i âmm-ı kātı‘ü’n-nizâ‘la ibrâ ve iskāt edip ve vekîl-i mezbûr Mehmed Çelebi dahi kezâlik hukūk-ı ma‘lûme ve mechûleye müte‘allika cemî‘ de‘âvî ve muhâsamâtdan bi’l-vekâle benim zimmetimi ibrâ-i âmm-ı râfi‘ü’l-hısâm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Abdülhalim Efendi b. Ahmed, İsmail Efendi b. İbrahim, Musa b. Muhyiddin, Ahmed Efendi b. ( ), İvaz Efendi el-kâtib, İbrahim Çelebi b. el-Hâc Osman, İbrahim Çelebi b. Ahmed ve gayruhüm.