İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 410 Hüküm no: 420 Orijinal metin no: [110a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sipahiler Kethüdâsı Murad Ağa b. Abdullah’ın arsasını Mehmed Halîfe b. Musa’ya sattığı Mahmiye-i İstanbul’da Tülbentçi Hüsam mahallesi ahâlîsinden olup hâlâ sipâhiler kethüdâsı olan umdetü’l-emâsil ve’l-a‘yân Murad Ağa b. Abdullah nâm kimesne tarafından husûs-ı âti’l-beyâna vekîl olduğu İbrahim Çavuş b. Mustafa ve Halil Çavuş b. Ahmed nâm kimesneler şehâdetleri ile şer‘an sâbit olan mefharü’l-emâsil ve’l-eşbâh Ahmed Ağa b. Mustafa meclis-i şer‘-i şerîfde hâlâ mukābele-i süvaride başhalîfe olan umdetü erbâbü’t-tahrîr ve’l-kalem zübdetü ashâbü’t-tastîr ve’r-rakam sâhib-i hâze’l-kitâb Mehmed Halîfe b. Musa Efendi tarafından husûs-ı câ’i’z-zikre vekîl olduğu merkūmân İbrahim Çavuş ve Halil Çavuş şehâdetleri ile şer‘an sâbit olan fahrü’l-akrân hâfız Mehmed Efendi b. Hızır mahzarında bi’l-vekâle ikrâr ve takrîr-i kelâm [110b] edip müvekkilim merkūm Murad Ağa yedinde mülkü olup mahalle-i mezbûrede vâki‘ bir tarafdan sâbıkan Rumeli kazaskeri olan a‘lemü’l-ulemâ’i’l-mütebahhirîn Mehmed İzzetî Efendi hazretleri odaları ve bir tarafdan el-Hâc Rıdvan mülkü olan arsa ve iki tarafdan tarîk-i âm ile mahdûd etrâf-ı erba‘adan taş duvar ve bi’r-i mâ ve bir ahırı müştemile arsasını, bi cümleti’t-tevâbi‘ ve’l-levâhık mûmâ-ileyh Mehmed Halîfe’ye tarafeynden îcâb ve kabûlü hâvî bey‘-i kat‘î ile üç yüz kıt‘a esedî guruşa bey‘ ve teslîm ol dahi iştirâ ve tesellüm ettiğinden sonra semen-i mezbûr üç yüz guruşu müvekkil-i merkūm Murad Ağa vekîl-i merkūm hâfız Mehmed Efendi yedinden tamâmen ahz u kabz eyledi ba‘de’l-yevm arsa-i mahdûde-i mezkûre mûmâ-ileyh Mehmed Halîfe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Umdetü erbâbü’t-tahrîr ve’l-kalem Mehmed Efendi b. Hızır, Mecdîzâde demekle şehîr mefharü erbâbü’t-tahrîr ve’l-kalem Osman Halîfe, Hasan Halîfe Karahisarî, Mehmed Halîfe kîsedâr-ı mukābele, Ahmed Halîfe-i mukābele, Ahmed Halîfe, Mustafa Halîfe, Süleyman Çavuş, Mustafa Çelebi b. el-Hâc Ahmed, Osman b. Mustafa.