İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 411 Hüküm no: 421 Orijinal metin no: [110b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Yusuf’un arsasını bey‘ bi’l-istiğlâl yoluyla yeniçeri bölüğü vakfına sattığı Mahmiye-i İstanbul’da Dülgerzâde mahallesinde sâkine Fâtıma bt. Yusuf nâm hâtunun sadrî oğlu ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mustafa Beşe b. Ahmed ve Cafer Beşe b. Abdullah nâm kimesneler şehâdetleri ile şer‘an sâbit olan Ebûbekir Çelebi b. Osman nâm kimesne meclis-i şer‘-i şerîfde Dergâh-ı âlî yeniçerilerinin on altıncı ağa bölüğüne mahsûs oda nukūd-ı mevkūfesine bi’l-fi‘l mütevellî olan el-Hâc Mustafa b. Ömer nâm kimesne mahzarında ikrâr ve takrîr-i kelâm edip müvekkilem mezbûre Fâtıma silk-i mülkünde münselik olup mahalle-i mezbûrede vâki‘ bir tarafdan imâma meşrûta vakıf menzil ve bir tarafdan Oruc Beşe menzili ve bir tarafdan ba‘zan müezzine meşrûta menzil ve ba‘zan tarîk-i âm ve taraf-ı râbi‘i yine tarîk-i âm ile mahdûd eşcâr-ı müsmire ve gayr-ı müsmireyi ve su kuyusu ve havluyu müştemil mülk arsasını, mütevellî-i mezbûr el-Hâc Mustafa’ya dört yüz esedî guruşa bi tarîki’l-istiğlâl bey‘ ve teslîm ol dahi iştirâ ve tesellüm ve kabûl ettikden sonra semeni olan meblağ-ı mezbûr dört yüz esedî guruşu mütevellî-i mezbûr yedinde olan mâl-ı vakf-ı mezbûrdan müvekkilem mezbûre Fâtıma’ya edâ ve teslîm ol dahi ahz u kabz ettikden sonra mütevellî-i merkūm zikr olunan arsayı ba‘de’t-tahliyyeti’ş-şer‘iyye ve’t-tekābuzi’ş-şer‘î târih-i kitâbdan bir sene tamâmına değin kırk sekiz guruşa [111a] müvekkilem mezbûre Fâtıma’ya îcâr ve teslîm ol dahi istîcâr ve tesellüm ettikden sonra mârrü’z-zikr arsa derkine ve ücret-i lâzımesine tarafından emir ve kabûlü hâviye kefâlet-i sahîh-i şer‘î ile ben kefîl oldum dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ebûbekir Beşe b. Abdullah, Ali Beşe b. Abdullah, İmâm Mehmed Efendi b. Osman, Mehmed Beşe b. İbrahim ve gayruhüm.