İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 417 Hüküm no: 431 Orijinal metin no: [113b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çavuş b. Ahmed’in Mehmed Beşe b. Mustafa’nın câriyesi Mariya’yı haksız yere alıkoyduğu, teslim etmesi gerektiği Dergâh-ı âlî yeniçerilerinden yetmiş birinci Samsonculara mahsûs oda yoldaşlarından râfi‘-i hâze’l-kitâb Mehmed Beşe b. Mustafa nâm kimesne meclis-i şer‘-i şerîfde elli dördüncü bölüğe mahsûs oda ahâlîsinden Hüseyin Çavuş b. Ahmed mahzarında üzerine da‘vâ ve takrîr-i kelâm edip mezbûr Hüseyin Çavuş’un yedinde olan işbu uzun boylu gök ala gözlü açık kaşlı Mariya [nâm] câriye yedimde mülk ve hakkım olup bin seksen altı senesi Şa‘bânı evâhirinde vilâyet-i Boğdan’da Kalas kasabası kurbunda Purut suyu kenarında ibâk etmişdi hâlâ mevsûfe-i mezbûre merkūm Hüseyin Çavuş yedinde olup bi gayri hakkın vaz‘-ı yed etmekle suâl olunup mevsûfe-i mezbûreyi bana teslîme merkūm Hüseyin Çavuş’a tenbîh olunmak matlûbumdur dedikde gıbbe’s-suâl merkūm Hüseyin Çavuş cevâbında târih-i mezbûrdan bir ay sonra mevsûfe-i mezbûreyi medîne-i Edirne’de Mehmed Beşe nâm kimesneden kırk beş guruş semen-i makbûza iştirâ ve kabz etmekle mülküm olmak üzre vaz‘-ı yed ederim deyip müdde‘î-i mezbûrun mülkü olduğu ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda Hamid sancağında Yalvaç Karaağacı kazâsına tâbi‘ Avşar nâm karyeden olup erbâb-ı tîmardan olup misâfiren mahmiye-i İstanbul’da Çukur han’da sâkin olan İbrahim Bey b. Ali ve yetmiş birinci cemâ‘ate mahsûs oda ahâlîsinden Hamza Beşe b. Yusuf nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mevsûfe-i mezbûre târih-i mezbûrdan mukaddem müdde‘î-i mezbûrun yedinde mülkü ve hakkı idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘-i şerîfden irsâl olunan Mevlânâ es-Seyyid Muharrem Efendi b. es-Seyyid İsmail evvelâ zikr olunan Çukur han’a varıp sükkânından olup mârrü’z-zikr Hamid sancağı tüccârından el-Hâc Mustafa b. Hamza ve Mehmed Çelebi b. Hasan ve Mahmud b. İvaz ve Ahmed b. Hasan ve Muharrem b. Abdülkādir ve Receb b. Ahmed ve el-Hâc Abdurrahman b. Ali nâm kimesnelerden şâhid-i mezbûr İbrahim Bey keyfiyyet-i hâlini suâl ve sâniyen mârrü’z-zikr yetmiş bir cemâ‘ate mahsûs odaya varıp ahâlîsinden [114a] odabaşı Mustafa Beşe b. Abdullah ve Hasan Beşe b. Abdullah ve es-Seyyid Hüseyin Çelebi b. Mehmed ve Abdi Beşe b. Bayram ve İbrahim Beşe b. İvaz ve Receb Beşe b. Rıdvan ve Mustafa Beşe b. Abdullah ve el-Hâc Ömer Beşe [b.] Hasan nâm kimesnelerden şâhid-i mezbûr Hamza Beşe’nin keyfiyyet-i hâlini suâl eyledikde her biri şâhidân-ı mezbûrân için adl ve makbûlü’ş-şehâde olduklarını haber verdiklerini Mevlânâ-yı mezbûr mahallinde tahrîr ve ma‘an irsâl olunan Mahmud b. Ömer ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olunduklarından sonra şehâdetleri makbûle olup müdde‘î-i mezbûr Mehmed Beşe mevsûfe-i mezbûreyi âhar[a] bey‘ yâ hibe yâ bir tarîk ile mülkünden ihrâc etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince mevsûfe-i mezbûreyi mezbûr Mehmed Beşe’ye teslîme mezbûr Hüseyin Çavuş’a tenbîh olundukdan sonra mezbûr Mehmed Beşe mevsûfe-i mezbûreyi merkūm Hüseyin Çavuş yedinden kabz ve tesellüm ettiğini i‘tirâf etmeğin mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Osman Çavuş 27. b[ölük], Mahmud Çorbacı 6. b[ölük], Osman Çavuş 27. b[ölük], İbrahim Çelebi b. Mehmed, Osman b. Ömer, Hasan Çelebi kāimmakām.