İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 418 Hüküm no: 432 Orijinal metin no: [114a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karahisar-ı Sâhib kazası ahalisinin kendilerinden haksız vergi alındığı gerekçesiyle kazanın eski kadısı Mehmed Efendi b. Murad aleyhine açtıkları davada sulh oldukları Vilâyet-i Anadolu’da medîne-i Karahisar-ı Sâhib kazâsı müzâfâtından Öyük nâm karye ahâlîsinden İsmail b. Mehmed ve Kalecik nâm karyeden İvaz b. Ramazan ve medîne-i mezbûre sükkânından el-Hâc Ahmed b. el-Hâc Mustafa ve Ebûbekir b. Ömer ve Osman b. Halil ve Ahmed Ağa b. Hüseyin nâm kimesneler kendi taraflarından asâleten ve medîne-i mezbûre ahâlîsinden el-Hâc Abdürrezzak b. İlyas ve el-Hâc Abdi b. el-Hâc Bayram ve el-Hâc Osman b. Şaban, Pazarbaşı Mehmed ve Ebûbekir b. Ömer ve kazâ-i mezbûra tâbi‘ Elirek nâm karye ahâlîsinden Şaban b. Ömer Çakır nâm karyeden el-Hâc Çavuş b. Abdullah ve Sultanşâh b. el-Hâc Yunus ve Abdülkerim b. Mustafa ve Ali b. Hızır nâm kimesneler ve sâirleri taraflarından husûs-ı âti’l-beyâna vekîl oldukları nehc-i şer‘î üzre sâbit olmağla vekâleten meclis-i şer‘de, sâbıkan medîne-i mezbûre kadısı olan bâ‘is-i hâze’l-kitâb Mehmed Efendi b. Murad mahzarında her biri ikrâr ve takrîr-i kelâm edip mezbûr Mehmed Efendi bundan akdem medîne-i mezbûre kadısı iken sâbıkan medîne-i mezbûrede mütesellim olan Hüseyin Ağa’nın son devrinde harc-ı mahkeme nâmıyla bizim ve müvekkillerimizin bi gayri hakkın üç yüz guruşumuzu ahz u kabz etmekle biz dahi ber vech-i muharrer [114b] makbûzu olan meblağ-ı mezbûru bundan akdem mezbûr Mehmed Efendi’den da‘vâ ve taleb eylediğimizde, ol dahi meblağ-ı mezbûr üç yüz guruşu bize edâ ve teslîmden imtinâ‘ etmekle beynimizde nizâ‘-ı küllî vukū‘undan sonra muslihûn tavassut edip mezbûr Mehmed Efendi ile beynimizde yetmiş kıt‘a esedî guruş üzerine inşâ-i akd-i sulh ettiklerinde biz dahi asâleten ve vekâleten sulh-ı mezbûru kabûl ve bedel-i sulh olan meblağ-ı mezbûr yetmiş guruşu mezbûr Mehmed Efendi yedinden tamâmen ahz u kabz eylediğimizden sonra bâkī iki yüz otuz esedî guruşdan ben asâleten ve vekâleten mezbûr Mehmed Efendi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt edip ve mezbûr Mehmed Efendi bedel-i sulh-ı mezbûra ve hukūk-ı ma‘lûme ve mechûleye müte‘allika cemî‘ da‘vâdan bizim ve müvekkillerimizin zimmetlerini ibrâ ve iskāt eyledi dediklerinde gıbbe’t-tasdîki’ş-şer‘î mukırrûn-ı mezbûrûn meclis-i mezbûrda merkūm Mehmed Efendi muvâcehesinde her biri asâlete ve vekâleten ikrâr ve takrîr-i kelâm edip mezbûr Mehmed Efendi bundan esbak taraf-ı saltanat-ı aliyyeden üzerimize edâsı fermân olunan avârız ve bedel-i nüzül ve katır iştirâsı ve bundan akdem medîne-i mezbûre mütesellimi olan Süleyman Ağa’nın son devri ve zahîre-bahâ husûsları için kezâlik harc-ı mahkeme nâmıyla hilâf-ı şer‘ bizim bi gayri hakkın bi’d-defe‘ât bin sekiz yüz esedî guruşumuzu dahi ahz u kabz eylediğinden sonra meblağ-ı mezbûru mezbûr Mehmed Efendi’den kezâlik da‘vâ ve taleb eylediğimizde, ol dahi edâdan imtinâ‘ etmekle beynimizde nizâ‘-ı küllî vukū‘undan sonra vesâtet-ı muslihîn ile bin esedî guruşa mezbûr Mehmed Efendi ile sulh olup bedel-i sulh olan meblağ-ı mezbûr bin esedî guruşu dahi mukaddemâ merkūm Mehmed Efendi yedinden tamâmen ahz u kabz edip bâkī sekiz yüz esedî guruşdan biz mezbûr Mehmed Efendi’nin zimmetini ibrâ ve iskāt edip ve mezbûr Mehmed Efendi dahi bedel-i sulh olan meblağ-ı mezbûr bin esedî guruşa ve sâir hukūk-ı ma‘lûme ve mechûleye müte‘allika âmme-i de‘âvîden bizim zimmetimizi ibrâ-i âmm-ı kātı‘ü’n-nizâ‘la ibrâ ve iskāt etmiş idi dediklerinde mezbûr Mehmed Efendi mukırrûn-ı mezbûrûnu cemî‘ kelimât-ı meşrûhalarında vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, Musa Efendi b. Davud el-İmâm, Hasan b. Abdullah, Osman Efendi el-kadı, Cafer Efendi el-kadı.