İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 422 Hüküm no: 434 Orijinal metin no: [115b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâtib Bâli Vakfı mütevellisi Mehmed b. Mustafa’nın vakfa ait nakit parayla mülk satın almasına izin verildiği Mahmiye-i İstanbul’da merhûm Kâtib Bâli vakfına bi’l-fi‘l mütevellî olan mefharü erbâbü’t-tahrîr ve’l-kalem râfi‘-i hâze’l-kitâb Mehmed Efendi b. Mustafa nâm kimesne meclis-i şer‘-i şerîfde takrîr-i kelâm ve ta‘bîr ani’l-merâm edip hâlâ mütevellîsi olduğum vakf-ı mezbûrun nukūdu olup zıyâ‘ ihtimâli olmağla re’y-i hâkimü’ş-şer‘ ile akāra tebdîl olunmak vakf-ı mezbûra enfa‘ olmağın hâlâ yedimde olan fetvâ-yı şerîfe mûcebince nukūd-ı vakf-ı mezbûr ile münâsib bir yerde vakf-ı mezbûr için semen-i misli ile vakfa nâfi‘ akār iştirâsına taraf-ı şer‘den bana izin verilmek matlûbumdur deyû hâlâ şeyhülislâm ve müfti’l-enâm hallâlü’l-müşkilâti’d-dîniyye keşşâfü’l-mu‘dilâti’l-yakīniyye ferîdü’d-dehr vahîdü’l-asr sa‘âdetlü Ali Efendi [116a] hazretlerinin imzâ-i şerîfleri ile mümzât bir kıt‘a fetvâ-yı şerîfe ibrâz edip mazmûnunda Zeyd mütevellîsi olduğu vakıf nukūdu zıyâ‘ ihtimâli olmağla re’y-i hâkim ile vakfa nâfi‘ akāra tebdîle kādir olur mu el-cevâb olur deyû buyurulmağın nukūd-ı vakf-ı mezbûr ile münâsib yerde vakf-ı mezbûr için semen-i misli ile vakfa nâfi‘ akār iştirâsına mütevellî-i merkūm Mehmed Efendi’ye taraf-ı şer‘den izin verilip mâ hüve’l-vâki‘ hıfzan li’l-makāl ketb olundu. Fi’l-yevmi’s-sâmin ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Fahrü’l-akrân Mehmed Ağa b. Sinan, Zahrü’l-a‘yân el-Hâc Abdi Ağa b. el-Hâc Ahmed ser-tabbâhîn-i hâssa, es-Seyyid Mustafa b. es-Seyyid Halil, Zahrü’l-akrân sepetçi Mehmed Ağa, Ali Çelebi b. Mustafa, İslâm Ağa b. Ahmed.