İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 422 Hüküm no: 435 Orijinal metin no: [116a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayakkabıcı İbrahim b. Hasan’ın Macar asıllı kölesi Şâhin b. Abdülvehhâb’ı azat ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i şerîf-i âlîden Mevlânâ Mehmed Efendi b. Ali irsâl olunup ol dahi vilâyet-i Anadolu’da Yoros kazâsına tâbi‘a Anadolu Hisarı mahallâtından Muhtesib Sinan Efendi mahallesi ahâlîsinden olup mahmiye-i İstanbul’da Sancakdâr Hayreddin mahallesi sâkinlerinden ve Avratpazarı sûkunda haffâf tâ’ifesinden olan İbrahim Efendi b. Hasan nâm kimesnenin menziline varıp zeyl-i rakīmde isimleri terkīm olunan udûl-i müslimîn ve sikāt-ı muvahhidîn mahzarlarında akd-i meclis-i şer‘-i mübîn eyledikde merkūm İbrahim Efendi meclis-i ma‘kūd-ı mezbûrda bi’t-tav‘i’s-sâf ikrâr ve i‘tirâf edip bana rıkkını mu‘terif olan açık kaşlı ala gözlü uzun boylu Macariyyü’l-asl bâ‘is-i hâze’l-kitâb Şâhin b. Abdülvahhab nâm abd-i memlûkü hasbeten lillâhi’l-hallâk ve taleben li merzâti’r-rabbi’r-Rezzâk tahrîr ve i‘tâk ve zümre-i ahrâr-ı asliyeye ilhâk eyledim ba‘de’l-yevm mevsûf-ı mezkûr Şâhin sâir ahrâr-ı asliyyîn gibi hür olup üzerinde mevâlî için şer‘an sâbit olan hakk-ı velâdan mâ‘adâ hakkım kalmadı dedikde husûs-ı mezkûru Mevlânâ-yı mezbûr mahallinde tahrîr ve ma‘an irsâl olunan Mustafa Çelebi b. Ali ve İbrahim Çelebi b. Abdülmennân ile meclis-i şer‘-i hatîre gelip alâ vukū‘ihi inhâ ve takrîr eylediklerinde mâ hüve’l-vâki‘ bi’t-taleb ketb ve imlâ olundu. Tahrîren fî evâsıt-ı şehri Rebî‘ilevvel li sene seb‘a ve semânîn ve elf. Şuhûdü’l-hâl: Mustafa Ağa b. Mehmed, Mehmed Çelebi b. Kenan, Mustafa Çelebi b. Ali, diğer Mustafa Çelebi b. Osman.