İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 429 Hüküm no: 446 Orijinal metin no: [118b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Destodori v. Mihayil’in evini Yorgi v. Yani, Andorya v. Yani ve Kokona bt. Hristo’ya sattığı Mahmiye-i İstanbul’da Kumkapısı dâhilinde Muhsine Hâtun mahallesinde sâkin Destodori v. Mihayil nâm zimmî meclis-i şer‘-i şerîf-i lâzımü’t-teşrîfde, ashâbu hâze’s-sifr Yorgi v. Yani ve Andorya v. Yani ve zevcesi Kokona bt. Hristo nâm zimmîler muvâcehelerinde ikrâr-ı tâm ve takrîr-i kelâm edip akd-i âti’z-zikr sudûruna [119a] değin yedimde mülküm ve hakkım olup mahalle-i mezbûrede vâki‘ bir tarafdan Andorya nâm zimmî mülkü ve bir tarafdan Kürkçübaşı Süleyman Ağa vakfı ve iki tarafı tarîk-i âm ile mahdûd üç bâb fevkānî ve tahtânî oda ve havluyu [ve] su kuyusunu ve kenîfi müştemil mülk menzilimin nısf-ı şâyi‘i, mezbûr Yorgi’ye ve nısf-ı şâyi‘-i âharını dahi mezbûrân Andorya ve zevcesi Kokona’ya tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bi safkatin vâhidetin beş yüz kıt‘a esedî guruşa bey‘ ve teslîm anlar dahi minvâl-i muharrer üzre iştirâ ve kabûl ve tesellüm eylediklerinden sonra semeni olan meblağ-ı mezbûr beş yüz kıt‘a esedî guruşu mezbûrûn Yorgi ve Andorya ve Kokona yedlerinden bi’t-tamâm ahz u kabz eyledim ba‘de’l-yevm menzil-i mahdûd-ı mezkûr mezbûrûn Yorgi ve Andorya ve Kokona’nın vech-i muharrer üzre mülk-i müşterâlarıdır, diledikleri gibi mutasarrıf olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Halil Halîfe b. Musa el-Müezzin, Osman Beşe b. Ömer, Mehmed Çelebi b. Mustafa, İbrahim Çelebi b. Ahmed, Kostantin v. Nikola, Andorya v. Sak, İsak Usta v. Kokola.