İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 430 Hüküm no: 448 Orijinal metin no: [119b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in, Hamza b. Hasan Çavuş terekesindeki hissesi için Mustafa b. Ali’yi vekil tayin ettiği Vilâyet-i Anadolu’da İznikmid kasabasında Kârgir mahallesinde sâkin iken bundan akdem vefât eden Hamza b. Hasan Çavuş nâm kimesnenin li ebeveyn karındaşı kızının kızı ve hasren vârisi olup yine kasaba-i mezbûre ahâlîsinden hâlâ mahmiye-i İstanbul’da Sarıdemirci mahallesinde bi tarîki’l-müsâfere sâkine olan Ayşe bt. Mehmed nâm hâtun meclis-i şer‘-i şerîfde bâ‘is-i hâze’l-kitâb Karamürselli Mustafa b. Ali nâm kimesne mahzarında takrîr-i kelâm ve ta‘bîr ani’l-merâm edip müteveffâ-yı mezbûrun terekesine vâzı‘atü’l-yed olan Ümmühâni bt. Kurd ve Hasan nâm hâtundan da‘vâ ve taleb ve ahz u kabza ve bana îsâle ve kabz u îsâl mütevakkıf olduğu umûrun küllîsine mezbûr Mustafa’yı tarafımdan vekîl ve nâib-i menâb nasb ve ta‘yîn edip ol dahi vekâlet-i mezbûreyi kabûl ve hizmet-i lâzımesine edâya müte‘ahhid olmağın mâ vaka‘a bi’t-taleb ketb olundu. Fî gurreti şehri Rebî‘issânî li sene seb‘a ve semânîn ve elf. Şuhûdü’l-hâl: Süleyman b. Receb, Veli b. Mahmud, Musa Efendi b. Mustafa, Mehmed Efendi b. ( ) ve gayruhüm mine’l-hâzırîn.