İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 431 Hüküm no: 449 Orijinal metin no: [120a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın ev satışından dolayı İşkenos v. Manol ve karısı Fotine bt. Lefteri’de olan alacağını tahsil ettiği Mahmiye-i İstanbul hısnı ebvâbından Fenerkapısı dâhilinde Abdi Subaşı mahallesinde sâkin Mustafa b. Abdullah nâm kimesne meclis-i şer‘-i şerîf-i enverde mukaddemâ mahmiye-i mezbûrede mahalle-i mezbûre sükkânından olup hâlâ mahrûse-i Edirne’de Zincirlikuyulu mahallesinde sâkin olanları İşkenos v. Manol ve zevcesi Fotine bt. Lefteri nâm zimmîler taraflarından husûs-ı âti’l-beyâna vekîl olduğu nehc-i şer‘î ve tarîk-i mer‘î üzre sâbit olan Ador v. Kiryako nâm zimmî muvâcehesinde ikrâr-ı tâm ve takrîr-i kelâm edip mukaddemâ mahmiye-i mezbûrede mârrü’z-zikr olan Abdi Subaşı mahallesinde vâki‘ bir tarafdan Dimitraki nâm zimmî mülkü ve bir tarafdan Meydancı Palaş mülkü ve bir tarafdan Mesih Paşa vakfı ve bir tarafdan tarîk-i âm ile mahdûd bir bâb fevkānî ve bir bâb tahtânî odalar ve bi’r-i mâyı ve havluyu müştemil mülk menzilimi, cemî‘ tevâbi‘ ve levâhıkı ile müvekkilân-ı mezbûrân İşkenos ve Fotine’ye iki yüz yirmi esedî guruşa bey‘ ve teslîm anlar dahi iştirâ ve kabûl ettiklerinden sonra semeni olan meblağ-ı mezbûr iki yüz yirmi esedî guruşun yüz seksen esedî guruşu müvekkilân-ı merkūmân bana edâ ve teslîm ben dahi yedlerinden ahz u kabz etmiş idim, bâkī altmış guruş müvekkilân-ı mezbûrân zimmetlerinde bâkī kalmışdı hâlâ meblağ-ı bâkī-i merkūm altmış esedî guruşu vekîl-i merkūm Ador vekâleti hasebiyle bana edâ ve teslîm ben dahi yedinden tamâmen ahz u kabz eyledim ba‘de’l-yevm mârrü’z-zikr olan menzile ve menzil-i mezbûra muttasıl olan icâre-i mu‘accele ve müeccele ile mukaddemâ taht-ı tasarrufumda olup beynimizde ma‘lûm bedel-i makbûz mukābelesinde müvekkilân-ı mezbûrâna izn-i mütevellî ile ferâğ ve tefvîz eylediğim vakıf menzile da‘vâ ve nizâ‘ım kalmayıp, zikirleri mürûr eden menzileyn-i mezbûreyne müte‘allika âmme-i de‘âvîden müvekkilân-ı mezbûrân İşkenos ve Fotine’nin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İmâm Süleyman Efendi b. Abdullah, Müezzin Hasan Efendi b. Mehmed, es-Seyyid Mehmed b. es-Seyyid Ahmed, Hüseyin b. Hasan, Kurd b. Abdullah, kuyumcu Durmuş b. ( ), kazzâzî Mehmed Efendi.