İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 432 Hüküm no: 452 Orijinal metin no: [120b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sadaret Kaymakamı Osman Paşa’nın konağını müştemilatıyla birlikte Edirne Kaymakamı Hacı Yusuf Paşa’ya sattığı Dârü’l-hilâfeti’l-aliyye Kostantıniyye el-mahmiye’de hâlâ sadâret-i uzmâ ve vekâlet-i kübrâ kāimmakāmı olan düstûr-ı ekrem müşîr-i efham nizâmü’l-âlem nâzım-ı menâzımü’l-ümem mümehhid-i bünyânü’d-devleti ve’l-ikbâl müşeyyid-i erkânü’s-sa‘âdeti ve’l-iclâl sa‘âdetlü Osman Paşa -dâme birruhû ve feşâ-hazretleri meclis-i şer‘-i şerîf-i Ahmedî ve mahfil-i dîn-i münîf-i Muhammedî’de hâlâ Edirne kāimmakāmı olan düstûr-ı mükerrem-i zîşân müşîr-i müfahham-ı âlî-mekân müdebbir-i umûri’l-cumhûr bi’l-fikri’s-sâkıb mütemmim-i mehâmmi’l-enâm bi’r-re’yi’s-sâ’ib sa‘âdetlü el-Hâc Yusuf Paşa hazretleri taraf-ı bâhirü’ş-şereflerinden husûs-ı âti’l-beyâna vekîl olduğu fahrü’l-akrân İbrahim Ağa b. Derviş Mehmed ve Hüseyin Bey b. Ali nâm kimesneler şehâdetleri ile şer‘an sâbit olan hazînedârı fahrü’l-eşbâh Hüseyin Ağa b. Hasan nâm kimesne mahzarında ikrâr ve takrîr-i kelâm edip mahmiye-i mezbûrede Hocapaşa kurbunda Elvanzâde mahallesinde vâki‘, iki tarafdan tarîk-i âm ve iki tarafdan müvekkil-i müşârün-ileyhin mülkü ile mahdûd dâhiliyyesinin tabaka-i ulyâsında üç bâb oda ve iki sofa ve müceddeden binâ olunan iki bâb oda ve tabaka-i vustâsında iki bâb oda ve iki sofa ve müceddeden binâ olunan bir bâb oda ve bir kenîf ve bir tahtapûş ve tabaka-i süflîsinde bir hamam ve bir kebîr mahzen ve bir kiler ve zât-ı eşcâr-ı müsmire bahçe ve müceddeden binâ olunan köşkü ve havuzlu bir odamı ve hâriciyyesinin tabaka-ı ulyâsında kebîr ve sagīr dört bâb oda ve üç sofa ve iki kenîf ve tabaka-i vustâsında beş bâb oda ve üç sofa ve iki kenîf ve bir anbar ve tabaka-i süflîsinde bir kebîr ahır ve bir su mahzeni ve kanavât-ı müsennât ile muhrez bir buçuk masura mâ-i cârîyi müştemil menzilin mecmû‘ binâsı ve binâ zirâ‘ı ile bin beş yüz otuz bir zirâ‘ı mecmû‘ arsasının bin iki yüz elli bir zirâ‘ sırf mülküm ve sokak kapısında harem kapısına doğru tûlen ve arzen bi hesâb-ı terbî‘î yüz yetmiş zirâ‘ arsasının dahi senede Küçük Serdar Ağa vakfına üç yüz altmış akçe mukāta‘a ile ve ahır kapısından üzengi taşına doğru yola [121a] varınca tûlen on bir arzen on bi hesâb-ı terbî‘î yüz on zirâ‘ arsası dahi Cihân Bey vakfından olup ayda otuz akçe icâre-i müeccele ile ve menzil-i mezbûrun kapısı önünde vâki‘ olup merhûm Evliyâ Mehmed Efendi vakfından tûlen ve arzen bi hesâb-ı terbî‘î yüz elli zirâ‘ arsa yevmî bir akçe icâre-i müeccele ile taht-ı tasarrufumda olmağın hâlâ menzil-i mezbûrda cereyân eden mârrü’z-zikr buçuk masura sunun buçuk masurasını zikr olunan Evliyâ Efendi vakfından olan yüz elli zirâ‘ arsasının otuz zirâ‘ı üzerine mülküm olmak üzre izn-i mütevellî ile binâ eylediğim mahzene icrâ ettiğimden sonra zikr olunan buçuk masura su ve otuz zirâ‘ arsa üzerine binâ eylediğim mahzenden mâ‘adâ menzil-i mahdûd-ı mezkûrun mülküm olan müştemilât-ı mezkûresiyle mülk-i sırfım olan bin iki yüz elli bir zirâ‘ arsayı, cümle-i tevâbi‘ ve levâhıkı ve kâffe-i hukūk ve merâfıkı ile bi safkatin vâhidetin vekîl-i merkūm Hüseyin Ağa’ya bey‘-i kat‘î ile on bin altı yüz esedî guruşa bey‘ ve teslîm ol dahi müvekkil-i müşârün-ileyh el-Hâc Yusuf Paşa hazretleri için iştirâ ve tesellüm ettiğinden sonra Cihân Bey vakfından olan mârrü’z-zikr yüz on zirâ‘ arsayı mütevellîsi ma‘rifetiyle yüz on guruş bedel mukābelesinde ve Küçük Serdar Ağa vakfından olan sâlifü’z-zikr yüz yetmiş zirâ‘ arsayı mütevellîsi ma‘rifetiyle yüz yetmiş guruş bedel mukābelesinde ve Evliyâ Efendi vakfından olan mârrü’z-zikr yüz elli zirâ‘ arsanın mülküm olmak üzre binâ eylediğim mahzenin otuz zirâ‘ arsasından mâ‘adâsı olan yüz yirmi zirâ‘ arsasını mütevellîsi ma‘rifetiyle yüz yirmi guruş bedel mukābelesinde vekîl-i merkūm Hüseyin Ağa’ya ferâğ ve tefvîz ol dahi müvekkil-i müşârün-ileyh hazretleri için tefevvüz ve kabûl ettiğinden sonra semen-i mezkûr on bin altı yüz guruşu ve mârrü’z-zikr vakıf arsaların bedelleri olan cem‘an dört yüz guruşu min haysi’l-mecmû‘ on bir bin esedî guruşa bana edâ ve teslîm ben dahi ahz u kabz eyledim ba‘de’l-yevm menzil-i mahdûd-ı mezkûrda cereyân eden bir buçuk masura sunun buçuk masurası Evliyâ Efendi vakfından olan arsa üzerine binâ eylediğim mârrü’z-zikr mahzen benim mülküm olup zikr olunan suyun bir masurasıyla menzil-i mezbûrun ebniye-i mezkûresi ve arsasının dahi mülkü olan bin iki yüz elli bir zirâ‘ı müvekkil-i müşârün-ileyh el-Hâc Yusuf Paşa hazretlerinin emlâk-i müşterâsıdır, keyfe mâ yeşâ’ ve hasbe mâ yahtâr mutasarrıf olup evkāf-ı mezbûreden olan mârrü’z-zikr arsalara dahi hakk-ı müfevvezidir, emsâli gibi tasarruf eylesin dedikde gıbbe’t-tasdîki’ş-şifâhî ve’t-tahkīki’l-vicâhî mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Sâbıkan Surre emîni olan umdetü’l-emâcid ve’l-ekârim Mustafa Ağa b. İbrahim, mefharü erbâbü’t-tahrîr ve’l-kalem Hasan Efendi tezkire-i ûlâ, kıdvetü ashâbü’t-tastîr ve’r-rakam Yusuf Efendi tezkire-i sâniye, mefharü’l-a‘yân ve’l-eşbâh çavuşbaşı Murad Ağa, zahrü’l-akrân Ahmed Ağa b. Ali, sâbıkan uncubaşı fahrü’l-a‘yân Süleyman Ağa b. Ali, [121b] fahrü’l-akrân el-Hâc Ahmed Ağa b. Hızır, zahrü’l-eşbâh İslâm Ağa b. Ahmed, fahrü’l-akrân Hasan Ağa b. Halil ve gayruhüm.