İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 434 Hüküm no: 453 Orijinal metin no: [121b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Câriye olduğu iddia edilen Ayşe bt. Hasan’ın hür olduğu İşbu orta boylu açık kaşlı ala gözlü rıkk-ı sâbıkını mu‘terife olan bâ‘isetü hâze’l-kitâb Ayşe bt. Hasan nâm hâtun meclis-i şer‘-i şerîfde esirci tâ’ifesinden olup rakīk olmak üzre kendiye vâzı‘ü’l-yed olan Mustafa Çelebi b. Hasan ve Osman b. Abdullah nâm kimesneler mahzarlarında üzerlerine da‘vâ ve takrîr-i kelâm edip ben vilâyet-i Rumeli’nde Bosna ahâlîsinde Yenipazar kasabasında el-Hâc Ferhad mahallesi sâkinlerinden hürrü’l-asl olan Hasan nâm kimesnenin firâşından hâsıla hürretü’l-asl olan Fâtıma bt. Mustafa nâm hâtundan mütevellide olup hürretü’l-asl iken, mezbûr Mustafa Çelebi ve Osman’a suâl olunup üzerimde yed-i mubtılalarının kasr ve izâlesinde tenbîh olunup sebîlim tahliyye olunmak matlûbumdur dedikde gıbbe’s-suâl mezbûr Mustafa Çelebi cevâbında mevsûfe-i mezbûrenin nısfını mezbûr Osman’dan seksen guruş semen-i makbûza iştirâ eyledim deyip mezbûr Osman dahi cevâbında mevsûfe-i mezbûreyi târih-i kitâbdan ( ) mukaddem gāib ani’l-meclis İbrahim nâm kimesne rakīk olmak üzre bana yüz on yedi guruş semen-i makbûza bey‘ ve teslîm ben dahi iştirâ ve tesellüm etmekle câriye-i memlûkemiz olmağla vaz‘-ı yed ederiz, mevsûfe-i mezbûrenin ber vech-i muharrer hürretü’l-asl olduğu ma‘lûmumuz değildir deyicek müdde‘iye-i mezbûreden müdde‘âsını mübeyyine beyyine taleb olundukda kasaba-i mezbûre sükkânından el-Hâc Ahmed Ağa b. Ali ve Ali Bey b. Ahmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iye-i mezbûre Ayşe zikr olunan Yenipazar kasabasında el-Hâc Ferhad mahallesi sâkinlerinden hürretü’l-asl olan Hasan nâm kimesnenin firâşından hâsıla ve hürretü’l-asl olan Fâtıma nâm hâtundan mütevellid olup hürretü’l-asldır biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince mevsûfe-i mezbûrenin ber vech-i muharrer hürriyetine ba‘de’l-hükmi’ş-şer‘î üzerinde yed-i mubtılalarının kasr ve izâlesine mezbûrân Mustafa Çelebi ve Osman’a tenbîh olunup mevsûfe-i mezbûrenin sebîli tahliyye olunmağın mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed b. Hasan, İsmail b. Yunus, Veli Bey b. Hasan, Ramazan Bey b. Hasan, Hasan Çelebi b. Abdullah ve gayruhüm mine’l-hâzırîn.