İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 435 Hüküm no: 454 Orijinal metin no: [121b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa Bey b. Ramazan’ın evini Mustafa Çelebi b. Muharrem’e sattığı Mahmiye-i İstanbul’da Keçeci Pîrî mahallesinde sâkin el-Hâc Mustafa Bey b. Ramazan nâm kimesne meclis-i şer‘-i şerîf-i âlîde bâ‘is-i hâze’l-kitâb Mustafa Çelebi b. Muharrem mahzarında ikrâr ve takrîr-i kelâm [edip] akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan müşterî-i mezbûr mülk ve bir tarafdan Uzun Mustafa Beşe mülkü ve bir tarafdan mahalle imâmına meşrûta vakıf odalar ve bir tarafdan tarîk-i hâs ile mahdûd üç bâb tahtânî oda ve bir bâb fevkānî oda ve bir ahır ve cüneyne ve bir sofa ve iki kenîf ve bir su kuyusunu müştemil menzilimi, cemî‘ tevâbi‘ ve levâhıkıyla mezbûr Mustafa Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yirmi bin akçe[ye] bey‘ ve teslîm ol dahi ber vech-i muharrer iştirâ ve kabûl ve tesellüm ettiğinden sonra semeni olan meblağ-ı mezbûr yirmi bin akçeyi merkūm Mustafa Çelebi yedinden tamâmen ahz u kabz eyledim ba‘de’l-yevm menzil-i mahdûd-ı mezkûr mesfûr Mustafa Çelebi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn [122a] min şehri Rebî‘ilevvel li sene seb‘a ve semânîn ve elf. Şuhûdü’l-hâl: Fahrü’l-eimmeti’l-kirâm Mehmed Efendi b. Yusuf, Mehmed Çelebi b. Mustafa el-Müezzin, Ali Çelebi b. Şaban, el-Hâc Hasan b. İbrahim, Mustafa Beşe b. Yunus ve gayruhüm.