İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 436 Hüküm no: 455 Orijinal metin no: [122a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Muharrem’in ev ile bahçesini bey‘ bi’l-istiğlâl yoluyla kayyım Mustafa Çelebi b. Ömer’e sattığı Mahmiye-i İstanbul’da Keçeci Pîrî mahallesinde sâkin Mustafa b. Muharrem nâm kimesne meclis-i şer‘[d]e, bâ‘is-i hâze’l-vesîka kayyım Mustafa Çelebi b. Ömer mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd üç bâb tahtânî ve bir bâb fevkānî odaları bir ahır ve cüneyne ve bir sofa ve iki kenîf ve bir su kuyusunu muhtevî menzilimi ve menzil-i mezkûra muttasıl bir kıt‘a bahçemi bi safkatin vâhidetin mezbûr kayyım Mustafa’ya bi tarîki’l-istiğlâl yüz elli esedî guruşa bey‘ ve teslîm ol dahi ber vech-i muharrer iştirâ ve tesellüm ettiğinden sonra semeni olan meblağ-ı mezbûr yüz elli esedî guruşu mezbûr Mustafa Çelebi yedinden tamâmen ahz u kabz ettiğimden sonra mezbûr kayyım Mustafa Çelebi menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin yirmi iki buçuk esedî guruşa bana îcâr ve teslîm ve ben dahi ber vech-i muharrer istîcâr ve kabûl ve tesellüm eyledim dedikde gıbbe’t-tasdîki’ş-şer‘î bâyi‘-i mezbûr Mustafa meclis-i mezbûrda Mahmud b. Muslu nâm kimesne muvâcehesinde ikrâr ve takrîr-i kelâm edip eğer meblağ-ı mezbûr yüz elli esedî guruş sene tamâmına değin edâ edemez isem menzil-i mahdûd-ı mezkûr ile sâlifü’z-zikr bahçe semen-i misilleri ile âhara bey‘ ve semenden ber vech-i muharrer deynim olan meblağ-ı mezbûru edâya ve fazlasını bana îsâle ve kabz ve îsâl mütevakkıf olduğu umûru küllîsine tarafından mezbûr Mahmud küllemâ azeltüke fe-ente vekîli mazmûn[u] üzre azil ve in‘izâlden masûne vekâlet-i devriyye ile vekîl eyledim dedikde ol dahi kabûl ve merâsimini edâya ta‘ahhüd etmeğin mâ vaka‘a bi’t-taleb ketb olundu. Fî selhi Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Yusuf el-İmâm, Mehmed Çelebi b. Mustafa, Ali b. Süleyman, el-Hâc Hasan b. İbrahim, Mustafa Beşe b. Yunus, Mehmed b. Mustafa, Mustafa b. Mehmed, el-Hâc Mehmed, el-Hâc Mustafa, Ali b. Mehmed ve gayruhüm.