İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 437 Hüküm no: 456 Orijinal metin no: [122a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın açtığı nafaka davasında kocası Mehmed Dede b. Davud ile anlaştığı Mahmiye-i İstanbul’da Kethüdâ Hâtun mahallesinde sâkine olup zâtı ma‘rifet-i şer‘iyye ile ârifân İbrahim b. Şaban ve Abdullah Efendi b. Veli ta‘rîfleri ile mu‘arrefe olan Ayşe bt. Abdullah nâm hâtun meclis-i şer‘-i şerîfde hâlâ zevci olan bâ‘is-i hâze’l-kitâb Mehmed Dede b. Davud mahzarında ikrâr ve takrîr-i kelâm edip zevcim mezbûr Mehmed bundan akdem âhar diyâra gitmekle bana mezbûrun firâşından hâsıla sagīre kızım Hatice’nin her birimiz için yevmî beş akçe nafakamızdan dört senede müctemi‘ olan meblağ zevcim mezbûr Mehmed’den da‘vâ ve taleb ettiğimde ol dahi vech-i muharrer üzre da‘vâ eylediğin nafaka-i mezkûre hâkimü’ş-şer‘in farz ve takdîri ile değildir deyû edâdan imtinâ‘ etmekle beynimizde nizâ‘-i küllî vukū‘undan sonra muslihûn tavassut edip mezbûr Mehmed Dede ile [122b] beynimizde yirmi sekiz esedî guruş üzerine inşâ-i akd-i sulh eylediklerinde ben dahi sulh-ı mezbûru kabûl ettiğimden sonra mezbûr Mehmed Dede bedel-i sulh olan meblağ-ı mezbûrun on beş esedî guruşunu emri ile dâyinim olan işbu hâzır bi’l-meclis Karabet nâm zimmîye ve on esedî guruşunu dahi kezâlik emri ile gāib ani’l-meclis Acem ( ) nâm kimesneye deynim için edâ ve teslîm anlar dahi ber vech-i muharrer ahz u kabz eylediklerinden sonra bâkī üç esedî guruşunu dahi mezbûr Mehmed Dede yedinden tamâmen ahz u kabz edip husûs-ı mezkûra ve târih-i kitâba gelince beynimizde cereyân eden hukūk-ı ma‘lûme ve mechûleye müte‘allika âmme-i de‘âvî ve mütâlebâtdan ben mezbûr Mehmed Dede’nin zimmetini ibrâ ve iskāt edip mezbûr Mehmed Dede dahi bedel-i sulh olan meblağ-ı mezbûra müte‘allika cemî‘ da‘vâdan benim zimmetimi ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Efendi b. Şaban, Abdullah Efendi b. Veli, Mehmed Efendi b. Mehmed, İbrahim Çelebi b. Ahmed, Mamalı Beşi b. Mahmud ve gayruhüm.