İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 437 Hüküm no: 457 Orijinal metin no: [122b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa Bey b. Ali’nin malından 60 guruşun vakfedilip mütevelliliğine de Ali Beşe b. Abdullah’ın tayin olunduğu Elhamdü li veliyyihî ve’s-salâti alâ nebiyyihî ve alâ âlihî ve ashâbihî ecma‘în ve ba‘d sebeb-i tahrîr-i kitâb-ı şer‘î ve mûcib-i tastîr-i hitâb-ı mer‘î oldur ki Dârü’l-hilâfeti’l-aliyye el-Kostantıniyye el-mahmiye -humiyet ani’l-âfât ve’l-beliyye-mahallâtından Gül câmi‘i kurbunda Çukur mahallesinde sâkin iken bundan akdem vefât eden merhûm Mustafa Bey b. Ali’nin vesâyâ-yı şer‘iyyesi nâfiz ve teberru‘ât-ı mer‘iyyesi câize olduğu hâlde zimâm-ı istitâ‘în cânib-i cinâna atf edip sülüs-i cemî‘ malımdan mahalle-i mezbûrede vâki‘ çeşmenin ta‘mîr ve termîmine ve sâir levâzım-ı mühimmesi için kırk esedî guruş ve yine mahalle-i mezbûr mescid-i şerîfine mum iştirâsı için yirmi esedî guruş ki cem‘an altmış kıt‘a esedî guruş ifrâz ve benim için ber vech-i muharrer vakf-ı sahîh ile vakıf oluna deyû vasiyyet ve tenfîzine es-Seyyid Lütfullah Efendi b. Mustafa’yı vasiyy-i muhtâr nasb ve ihtiyâr edip vakf-ı mezbûrun tescîli ve şurût ve kuyûdu mezbûr es-Seyyid Lütfullah Efendi yedinde ola deyû şart ve musırran-aleyhâ kavmen? şuhûd-ı udûl ile alâ vechi’l-hasm sâbit ve mütehakkik oldukdan sonra mezbûr es-Seyyid Lütfullah Efendi meclis-i şer‘-i şerîf-i enver ve mahfil-i dîn-i münîf-i ezherde, vakf-ı âti’l-beyâna li ecli’t-tescîl mütevellî nasb ve ta‘yîn eylediği Ali Beşe b. Abdullah nâm kimesne mahzarında bi’l-vesâye ikrâr ve takrîr-i kelâm edip müteveffâ-yı mezbûr sülüs malından vesayeten makbûzum olan meblağ-ı mezbûr altmış kıt‘a esedî guruş vesâyet-i mahkiyem hasebiyle ber vech-i muharrer vakıf ve haps edip şöyle şart eyledim ki meblağ-ı mezbûr sene anı on bir buçuk hesâbı üzre rehin-i kavî ve kefîl-i melî ve lede’l-iktizâ bu ikisinden biri ile alâ vechi’l-helâl yed-i mütevellî ile istirbâh ve istiğlâl olunup bi fazli’llâhi te‘âlâ hâsıla olan gallesinden sene[de] altı esedî guruşu zikr olunan çeşmenin ta‘mîr ve termîmine ve sâir levâzım-ı mühimmesine harc ve sarf oluna ve üç esedî guruş ile dahi mahalle-i mezbûre mescid-i şerîfi için kifâyet mikdârı mum iştirâ olunup mescid-i mezbûrda îkād oluna ve fazla kalırsa asl-ı mâla zam oluna [ve] mezbûr Ali Beşe vakf-ı mezbûra hasbî mütevellî ola ve vakf-ı mezbûra ben ve ahâlî-i mahalle-i mezbûre hasbî nâzır olalar deyû [123a] meblağ-ı mezbûr altmış esedî guruşu mütevellî-i mezbûra teslîm ol dahi ber vech-i muharrer tesellüm ve kabz ve sâir mütevellîler evkāfda tasarrufları gibi tasarruf eyledi dedikde gıbbe’t-tasdîki’ş-şer‘î vasiyy-i merkūm es-Seyyid Lütfullah Efendi semt-i vifâkdan cânib-i şikāka rücû‘ edip vakf-ı nukūd inde’l-eimmeti’l-selâse bâtıl olmağla vakf-ı mezbûrdan rücû‘ ve meblağ-ı mezbûru istirdâd ve sâir vücûh-ı berre bezl-i sarf eylemek murâd ederim dedikde isre’l-istintâk mütevellî-i mezbûr cevâba mütesaddî olup eğerçi hâl bu minvâl üzredir lâkin İmâm Züfer’den İmâm Ensârî rivâyeti üzre câizdir binâen-aleyh vakf-ı nukūd-ı mezbûrenin sıhhatine hüküm taleb ederim deyû teslîmden imtinâ‘ edip hâkim-i muvakki‘-i [sadr-ı] kitâb hazretleri huzûrunda müterâfi‘ân olduklarında, hâkim-i mûmâ-ileyh -esbağallâhu ni‘amehû aleyh-hazretleri dahi rivâyet-i mezkûre üzre vakf-ı nukūd-ı mezkûrenin sıhhatine hükm eyledikden sonra vasiyy-i müşârün-ileyh i‘âde-i kelâm edip eğerçi hükm-i mezbûr ile vakf-ı mezkûre sıhhat hâsıla oldu lâkin İmâm-ı A‘zam hazretleri katından sıhhat lüzûmu müstelzim olmamağın nukūd-ı mezbûrenin vakfiyetinden bi’l-vesâye tekrâr rücû‘ eyledim dedikde mütevellî-i merkūm dahi tekrâr cevâba mütesaddî olup rivâyet-i mezkûre üzre sıhhatine hükm olunmağla sâir eimme-i kirâm kavilleri üzre dahi vakf-ı mezbûr sahîh olup sıhhat ise lâ-siyemâ ba‘de’t-teslîm ile’l-mütevellî İmâmeyn-i Hümâmeyn katlarında müstelzim-i lüzûm olmağla lüzûmuna dahi hüküm taleb ederim deyicek hâkim-i mûmâ-ileyh-lâ-zâle müşâren bi’l-benân ileyh-hazretleri dahi re’y-i İmâmeyn-i Hümâmeyn vakf-ı mezbûrun lüzûmuna dahi hükm etmeğin ba‘de’l-yevm vasiyy-i müşârün-ileyhin bi’l-vesâye vakfı sahîh ve lâzım olup nakz ve nakīzine mecâl muhâl oldu cerâ zâlik. Hurrire fi’l-yevmi’l-hâmis ve’l-ışrîn min şehri Rebî‘ilevvel li sene seb‘a ve semânîn ve elf min hicreti men lehü’l-izzi ve’ş-şeref. Şuhûdü’l-hâl: Hasan Efendi b. Abdülfettâh el-İmâm, Receb Efendi b. Hüsameddin el-Müezzin, el-Hâc Selim b. Şerefeddin, Mahmud Beşe b. Mehmed, Halil Beşe b. Mustafa, Ramazan b. Ali, Mehmed Beşe b. İsmail, Mehmed Ağa b. Hüseyin ve gayruhüm.