İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 443 Hüküm no: 464 Orijinal metin no: [124b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ahmed’in Rus câriyesi Canfeda’yı azat ettiği Mahmiye-i İstanbul’da Başçı mahallesi sâkinelerinden Fâtıma bt. Ahmed nâm hâtunun oğlu ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre ahâlîsinden İbrahim Beşe b. Hüseyin ve İbrahim Çelebi b. Şaban nâm kimesneler şehâdetleri ile şer‘an sâbit olan Süleyman Çelebi b. Abdülbâkī meclis-i şer‘-i şerîfde bi’l-vekâle ikrâr ve takrîr-i kelâm edip vâlidem müvekkilem mezbûre Fâtıma Hâtun kendiye rıkkıyyetini mu‘terife olan orta boylu açık kaşlı gök ala gözlü Rûsiyyetü’l-asl bâ‘isetü hâze’l-kitâb Canfeda bt. Abdülvahhab nâm câriye-i memlûkesini, hasbeten lillâhi’l-meliki’l-Hallâk ve taleben li merzâti’r-rabbi’r-Rezzâk malından tahrîr ve i‘tâk ve zümre-i harâir-i asliyeye idrâc ve ilhâk eyledi ba‘de’l-yevm mevsûfe-i mezbûre Canfeda sâir harâir-i asliyye gibi hürre olup üzerinde müvekkilem merkūme Fâtıma Hâtun’un velâ-i şer‘îden gayrı hakkı bâkī kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’s-sânî min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Çelebi el-Halebî, Mehmed Çelebi b. Haydar, Hasan Çelebi b. Ahmed, Osman b. Ömer, el-Hâc Mahmud Efendi, el-Hâc Mehmed b. el-Hâc Rıdvan, Tatar Mehmed Efendi, el-Hâc İsmail Çelebi b. ( ), Ahmed Ağa b. Mustafa, Mahmud Ağa b. Mustafa ve gayruhüm.