.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 102
Hüküm no: 96
Orijinal metin no: [15a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Şükrullah’ın evini Ali Bey b. Murtaza’ya sattığı

Vilâyet-i Anadolu’da Alâiye sancağında Manavgad kazâsına tâbi‘ İncirli nâm karye ahâlîsinden Şükrullah nâm kimesne mahfil-i kazâda husûs-ı câi’z-zikre kendi tarafından asâleten ve li-ebeveyn kız karındaşları (...) Neslihan ve Ümmühani hatunlar tarafından vekîl olup mezbûru ma‘rifet-i şer‘iyye ile ârifân olan (...) Mehmed nâm kimesneler şehâdetiyle vekâleti sâbite oldukdan sonra vekâleten işbu sâhibü’l-kitâb Ali Bey b. Murtaza nâm kimesne mahzarında ikrâr-ı tâm ve tâ‘bir ani’l-merâm kılıp medîne-i Üsküdar kazâsına tâbi‘ Çengel nâm karye sınırı dâhilinde bir tarafdan Yusuf Paşa (...) mülkü bir tarafdan merhûm el-Hâc Ömer Vakfı ve bir tarafdan vâdi ve ba‘zan tarîk-i âm ile mahdûd ve mümtâz olup iki bâb tahtânî ve bir bâb fevkānî büyûtu ve eşcâr-ı müsmire ve gayr-ı müsmire hadîkayı ve bi’r-i mâ ve kenîfi hâvî mülk menzilini asâleten ve vekâletim hasebiyle mezbûr Ali Bey’e yüz on yedi riyâlî guruşa bey‘-i bâtt-ı sahîh-i şer‘î ile bey‘ ve teslîm ol dahi iştirâ ve tesellüm ve kabûl eyledikden sonra semen-i mersûm yüz on yedi guruşu yedinden bi’t-tamam ahz ve istîfâ eyledim ba‘de’l-yevm menzil-i merkūm müşteri-yi mezbûrun mülk-i müşterâsı olup benim ve müvekkilelerimin menzil-i mersûmda kat‘an medhal ve alâkamız kalmamışdır, keyfe mâ yeşâ’ ve hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb sebt olundu.

Fi’l-yevmi’s-sâbi‘ min-Şevvâli’l-mükerrem li-sene selâse ve sittin ve elf.

Şuhûdü’l-hâl: Fazlullah Beşe b. Receb el-İmâm, İbrahim Beşe b. el-Hâc Hasan, Mehmed Beşe b. Abdüllatif, İbrahim Efendi b. Mehmed, Mehmed Beşe b. Mustafa.