İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 446 Hüküm no: 470 Orijinal metin no: [126a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasımpaşa’da Havvâ bt. Ahmed’in dengi olmadığı gerekçesiyle boşadığı kocası İbrahim b. Ahmed’den daha önceki anlaşması sebebiyle herhangi bir para talebinde bulunamayacağı Vilâyet-i Anadolu’da medîne-i İznikmid kazâsına tâbi‘ Değirmenderesi nâm karye sâkinelerinden olup hâlâ bi tarîki’l-müsâfere kasaba-i Kasımpaşa’da Yahya Kethüdâ odalarında sâkine Havvâ bt. Ahmed nâm hâtun meclis-i şer‘-i şerîfde Kıbtî tâ’ifesinden bâ‘is-i hâze’l-kitâb İbrahim b. Ahmed nâm kimesne mahzarında üzerine da‘vâ ve takrîr-i kelâm edip târih-i kitâbdan iki sene mukaddem Kıbtî olduğu ma‘lûm olmamağla iki bin akçe mehr-i müeccel üzerine nefsimi tezvîc ve inkâh ettiğimden sonra mezbûr İbrahim’in ba‘de’d-duhûl Kıbtî olduğu ma‘lûmum olup benim küfvüm olmadığına binâen bundan akdem mahmiye-i İstanbul’da Bâb nâibi olan Abdullah Efendi b. Mustafa huzûrunda mezbûr İbrahim ile müterâfi‘ân olup fesh-i akd-i nikâha tâlib olduğumda mûmâ-ileyh Abdullah Efendi dahi akd-i mezbûru fesh etmekle mehr-i müeccelim olan meblağ-ı mezbûr iki bin akçe mezbûr İbrahim’in zimmetinde kalmağın hâlâ suâl olunup mehr-i müeccelim olan meblağ-ı mezbûrun alıverilmesi matlûbumdur dedikde gıbbe’s-suâl mezbûr İbrahim cevâbında kaziyye minvâl-i muharrer üzre olduğunu ikrâr, lâkin medîne-i mezbûra bin seksen beş senesi şehri Ramazânı’nın on yedinci günü ber vech-i muharrer zimmetimde mütekarrir ve ma‘kūdun-aleyh mehr-i müecceli olan meblağ-ı mezbûr iki bin akçeden benim zimmetimi şuhûd mahzarında ibrâ ve iskāt etmiş idi deyû def‘ ile mukābele edicek gıbbe’l-istintâk ve’l-inkâr mezbûr İbrahim’den def‘-i mezbûrunu mübeyyine beyyine taleb olundukda udûl-i müslimînden olup mahmiye-i mezbûrede Harâccı Muhyiddin mahallesi câmi‘-i şerîfi’nde imâm olan Hasan Efendi b. Mustafa ve müezzin olan Mehmed Halîfe b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iye-i mezbûre Havvâ sâbıkan zevci olan mezbûr İbrahim zimmetinde mütekarrir ve ma‘kūdun-aleyh mehr-i müecceli olan meblağ-ı mezbûr iki bin akçeden mezbûr İbrahim’in zimmetini bin seksen beş senesi Ramazan-ı şerîfi’nin on yedinci günü bizim huzûrumuzda ibrâ ve iskāt etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘iye-i mezbûre bî-vech mu‘ârazadan men‘ olunup mâ vaka‘a bi’t-taleb ketb olundu. Fî selh-i Rebî‘ilevvel li sene seb‘a ve semânîn ve elf. Şuhûdü’l-hâl: Hüseyin Beşe b. Mehmed, Soğanlı Mustafa, Eyyûb b. Mehmed, Ebûbekir b. ( ) ve gayruhüm.