İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 447 Hüküm no: 471 Orijinal metin no: [126a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali Efendi’nin evini İbrahim Ağa’ya sattığı Husûs-ı âti’l-beyânın mahallinde tahrîri için bi’l-iltimâs cânib-i şer‘-i kavîmden Mevlânâ Abdullah Efendi b. Veliyyüddin irsâl olunup ol dahi sâbıkan Sakız kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm Mehmed Efendi’nin Dârü’s-saltanati’l-aliyye Kostantıniyye el-mahmiye’de Şeyh Resmî mahallesinde vâki‘ sa‘âdet-hânelerine varıp zeyl-i sahîfede mastûrü’l-esâmî olan müslimîn huzûrlarında akd-i meclis-i şer‘-i mübîn eyledikde mahmiye-i mahkiyede merhûm Kirmasti mahallesinde sâkine fahrü’l-müderrisînü’l-kirâm es-Seyyid Ali Efendi b. es-Seyyid Abdülhâlik meclis-i ma‘kūd-ı mezbûrda, bâ‘is-i hâze’l-kitâb İbrahim Ağa b. Abdullah nâm kimesne mahzarında takrîr-i kelâm ve bast-ı merâm edip akd-i âtî sudûruna değin silk-i mülk-i sahîhimde münselik olup mahmiye-i mezbûrede Mimar Sinan mahallesinde vâki‘ bir tarafdan yorgancı Sâlih Çelebi tasarrufunda olan vakf-ı menzil ve bir tarafdan kazzâz Mehmed Efendi nâm kimesne mülkü ve iki tarafdan tarîk-i âm ile mahdûd olup fevkānî iki bâb oda [126b] ve bir sofa ve bir tahtapûş ve orta tabakada bir bâb oda ve bir matbah ve bir su kuyusu ve iki kenîfi müştemil mülk menzilimi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr İbrahim Ağa’ya tarafeynden îcâb ve kabûlü hâvî ve şerâ’it-i müfsideden ârî bey‘-i bâtt-ı sahîh-i şer‘î ile beş yüz kıt‘a esedî guruşa bey‘ ve teslîm ol dahi ber vech-i muharrer iştirâ ve tesellüm eylediğinden sonra semeni olan meblağ-ı mezbûr beş yüz kıt‘a esedî guruşa merhûm İbrahim Ağa yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûr, mezbûr İbrahim Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î hukūk-ı mezbûru Mevlânâ-yı mersûm mahallinde tahrîr ve ma‘an irsâl olunan Durmuş b. Veli nâm kimesne ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâlis min şehri Rebî‘ilevvel li sene seb‘a ve semânîn ve elf. Şuhûdü’l-hâl: Fahrü’l-kuzâti’l-İslâm Ebûbekir Efendi, umdetü’l-kuzât Bayezid Efendi b. Abdullah, Mehmed Efendi [b.] Hüseyin Efendi, Şaban b. Ahmed Efendi.