İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 448 Hüküm no: 472 Orijinal metin no: [126b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Mehmed’in evini Sâliha bt. Abdülmennân’a sattığı Mahmiye-i İstanbul’da Kovacı Dede mahallesinde sâkine Hatice bt. Mehmed nâm hâtun meclis-i şer‘-i şerîf-i lâzımü’t-teşrîfde, bâ‘isetü hâze’l-kitâb Sâliha bt. Abdülmennân nâm hâtun mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahmiye-i mezbûrede vâki‘ iki tarafdan es-Seyyid Talha Çelebi tasarrufundan olan menzil ve bir tarafdan bâyi‘a-i mezbûre tasarrufundan olan vakıf menzil ve bir tarafdan tarîk-i hâs ile mahdûd bir bâb tahtânî oda ve bir sofa ve havlu ve kenîfi müştemil menzilimi, cümle tevâbi‘ ve levâhıkı ve kâffe-i hukūk ve merâfıkı ile mezbûre Sâliha Hâtun’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile seksen kıt‘a esedî guruşa bey‘ ve teslîm ol dahi minvâl-i muharrer üzre iştirâ ve tesellüm ve kabz eyledikden sonra semeni olan meblağ-ı mezbûr seksen kıt‘a esedî guruşu mezbûre Sâliha Hâtun yedinden bi’t-tamâm ahz u kabz eyledim ba‘de’l-yevm menzil-i mahdûd-ı mezkûr mezbûre Sâliha Hâtun’un mülk-i müşterâsıdır, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ali Efendi b. eş-Şeyh Mehmed Efendi, İbrahim Beşe b. Osman, sarrâc Yusuf Çelebi, el-Hâc Mehmed es-Sarrâc, Veli Çelebi es-Sarrâc, Kadri Çelebi b. Ali, Mustafa Çelebi b. el-Hâc Ahmed, Muharrem Çelebi b. Mustafa, Ali Beşe b. Şaban ve gayruhüm.