İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 448 Hüküm no: 473 Orijinal metin no: [127a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah bt. Hamza’nın muhâla‘a yoluyla boşandığı kocası Musa b. Mehmed’den hamile olduğu ve nafaka tayini Mahmiye-i İstanbul’da Macuncu mahallesinde sâkine Emetullah bt. Hamza nâm hâtun meclis-i şer‘-i şerîf-i enverde zevc-i muhâlı‘ı Musa b. Mehmed nâm kimesne mahzarında takrîr-i kelâm ve ta‘bîr ani’l-merâm edip târih-i kitâbdan kırk gün mukaddem hamlim olmamak zu‘muyla mezbûr Musa ile mehr-i müeccelim ve nafaka-i iddet-i ma‘lûmem üzerlerine muhâla‘a-i sahîha-i şer‘iyye ile muhâla‘a edip mezbûr Musa dahi muhâla‘a-i mezbûreyi kabûl etmiş idi hâlâ mezbûr Musa’nın firâşından hamlim zuhûr etmekle vaz‘-ı haml edinceye değin nafakam için taraf-ı şer‘den kadr-ı ma‘rûf akçe takdîr olunmak matlûbumdur dedikde fi’l-vâki‘ kaziyye minvâl-i meşrûh üzre olup mezbûre Emetullah’ın ber vech-i muharrer hamli zâhir olduğunu mezbûr Musa i‘tirâf etmeğin hâkim-i muvakki‘-i sadr-ı kitâb tûbâ-lehû ve hüsnü me’âb hazretleri târih-i kitâbdan mezbûre Emetullah’ın nafakası için vaz‘-ı haml edinceye değin yevmî üçer akçe karz ve takdîr edip meblağ-ı mezbûru nafakasına sarfa ve vakt-i zarûretde istidâneye ve lede’z-zafer rücû‘a mezbûre Emetullah’a2 izin verilmeğin mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilâhir li sene seb‘a ve semânîn ve elf. Şuhûdü’l-hâl: es-Seyyid Muharrem b. es-Seyyid İsmail, İbrahim b. Mehmed, Musa b. Mustafa, Ebûbekir b. Hüseyin, Veli Beşe b. Osman.