İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 449 Hüküm no: 474 Orijinal metin no: [127a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in Hasan Beşe b. Mustafa’dan muhâla‘a yoluyla boşandığı Mahmiye-i İstanbul’da Mimar Sinan mahallesi sâkinelerinden Ayşe bt. Mehmed nâm hâtun zâtı mahalle-i mezbûre sükkânından İsmail Çelebi b. Mehmed ve Ahmed b. Ali nâm kimesneler ta‘rîfleriyle mu‘arrefe oldukdan sonra meclis-i şer‘-i şerîfde zevci dâhili Hasan Beşe b. Mustafa nâm kimesne mahzarında ikrâr-ı tâm ve takrîr-i kelâm edip zevcim mezbûr Hasan Beşe zimmetinde mütekarrir ve ma‘kūdun-aleyh olan iki yüz elli akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me‘ûnet-i süknâm dahi kendi üzerime olmak üzre, mezbûr Hasan Beşe ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eylediğinden sonra hukūk-ı zevciyyete ve gayra müte‘allika âmme-i de‘âvâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Çelebi b. Mustafa, İsmail Çelebi b. Ali, Ali b. Abdullah, Hüseyin b. Receb ve gayruhüm.