İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 449 Hüküm no: 475 Orijinal metin no: [127a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe b. İbrahim’in evini İncekara Mehmed Çavuş Vakfı’na bey‘ bi’l-istiğlâl yoluyla sattığı Mahmiye-i İstanbul’da Yenibahçe kurbunda Karabaş mahallesi sâkinlerinden Hüseyin Beşe b. İbrahim nâm kimesne meclis-i şer‘-i şerîfde merhûm İncekara Mehmed Çavuş vakfına hâlâ mütevellî olan bâ‘is-i hâze’l-kitâb es-Seyyid Mehmed Efendi b. Yusuf mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ [127b] bir tarafdan tarîk-i âm ve bir tarafdan İsmail Efendi ve bir tarafdan İbrahim Çelebi mülkü ve bir tarafdan zevcem işbu hâzıre bi’l-meclis Belkıs bt. Abdullah nâm hâtun mülkü ile mahdûd fevkānî bir bâb oda ve dehliz ve tahtânî bir ahır ve zât-ı eşcâr bahçe ve kenîfi müştemil menzilimi, bi cümleti’t-tevâbi‘ mütevellî-i merkūm es-Seyyid Mehmed Efendi’ye yüz kıt‘a esedî guruşa bi tarîki’l-istiğlâl bey‘ ve teslîm ol dahi ba‘de’l-iştirâ ve’t-tesellüm semen-i mezbûr yüz guruşu yedinde olan mâl-ı vakf-ı mezbûrdan bana edâ ve teslîm ben dahi ahz u kabz ettiğimden sonra mütevellî-i mezbûr es-Seyyid Mehmed Efendi menzil-i mezbûru ba‘de’t-tahliyyeti’ş-şer‘iyye ve’t-takābuzi’l-mer‘î senede on beş guruş olmak üzre târih-i kitâbdan üç sene tamâmına değin kırk beş guruşa bana îcâr ve teslîm ben dahi istîcâr ve tesellüm eyledim dedikde gıbbe’t-tasdîki’ş-şer‘î merkūm Hüseyin Beşe’nin zevcesi olan merkūme Belkıs meblağ-ı mezbûr yüz guruşa ve ücret-i lâzıme mezbûreye tarafeynden emir ve kabûlü hâviye kefâlet ile kefîl olmağın mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ahmed Efendi b. Ali el-İmâm, Mehmed Halîfe b. Mustafa el-Müezzin, Mustafa Beşe b. Yunus, Ömer Çelebi b. Mehmed, Mahmud b. İsmail, Hüseyin Çelebi b. ( ) ve gayruhüm.