İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 450 Hüküm no: 476 Orijinal metin no: [127b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın evini İncekara Mehmed Çavuş Vakfı’na bey‘ bi’l-istiğlâl yoluyla sattığı Mahmiye-i İstanbul’da Yenibahçe kurbunda Karabaş mahallesi sâkinelerinden Belkıs bt. Abdullah nâm hâtun zâtı ma‘rifet-i şer‘iyye ile ârifân zevci Hüseyin b. İbrahim ve mahalle-i mezbûre ahâlîsinden Müezzin Mehmed Halîfe b. Mustafa nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde merhûm İncekara Mehmed Çavuş vakfına hâlâ mütevellî olan bâ‘is-i hâze’l-kitâb es-Seyyid Mehmed Efendi b. Yusuf nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olan mahalle-i mezbûrede vâki‘ bir tarafdan İsmail Efendi mülkü ve bir tarafdan Ayşe Hâtun vakfı ve bir tarafdan zevcim merkūm Hüseyin mülkü ve bir tarafdan tarîk-i âm ile mahdûd fevkānî iki bâb oda ve bir sofa ve bir tahtapûş ve tahtında bir su kuyusu ve zât-ı eşcâr bahçeyi müştemil menzilimi, bi cümleti’t-tevâbi‘ mütevellî-i mezbûr es-Seyyid Mehmed Efendi’ye bi tarîki’l-istiğlâl yüz esedî guruşa bey‘ ve teslîm ol dahi ba‘de’l-iştirâ ve’t-tesellüm, semen-i mezbûr yüz guruşu yedinde olan mâl-ı vakf-ı mezbûrdan bana edâ ve teslîm ben dahi ahz u kabz ettiğimden sonra mütevellî-i mezbûr es-Seyyid Mehmed Efendi menzil-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î senede on beş guruşa olmak üzre târih-i kitâbdan üç sene tamâmına değin kırk beş guruşa bana îcâr ve teslîm edip ben dahi istîcâr ve tesellüm eyledim dedikde [128a] gıbbe’t-tasdîki’ş-şer‘î mezbûre Belkıs Hâtun’un zevci merkūm Hüseyin semen-i mezbûr yüz guruşa ve ücret-i lâzıme-i merkūmeye tarafeynden emir ve kabûlü hâviye kefâlet ile kefîl olmağın mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Ahmed Efendi b. Ali el-İmâm, Mehmed Halîfe b. Mustafa el-Müezzin, Mustafa Beşe b. Yunus, Ömer Çelebi b. Mehmed, Mahmu[d] b. İsmail ve gayruhüm.