İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 451 Hüküm no: 477 Orijinal metin no: [128a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ezmerağda bt. Anastaş’ın boşandığı kocası Aleksandra v. Panayot’tan alacağını tahsil ettiği ve sulh oldukları Mahmiye-i İstanbul’da hısnı ebvâbından Edirnekapısı dâhilinde Hacı Muhyiddin mahallesinde sâkine olup zâtı ma‘rifet-i şer‘iyye ile ârifân İbrahim Çelebi b. Mustafa ve Mehmed b. Abdullah nâm kimesneler ta‘rîfleri ile mu‘arrefe olan Ezmerağda bt. Anastaş nâm Nasrâniyye meclis-i şer‘-i şerîfde zevc-i muhâlı‘ı bâ‘is-i hâze’s-sifr Aleksandra v. Panayot nâm kimesne mahzarında ikrâr ve takrîr-i kelâm edip mezbûr Aleksandra zimmetinde mütekarrir ve ma‘kūdun-aleyh olan iki bin akçe mehr-i müeccelimi bundan akdem da‘vâ ve taleb eylediğimde, ol dahi edâdan imtinâ‘ etmekle beynimize muslihûn tavassut edip mezbûr Aleksandra ile beynimizde yüz seksen akçe üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yüz seksen akçeyi mezbûr Aleksandra yedinden ahz u kabz eylediğimden sonra mehr-i mezbûra müte‘allika âmme-i de‘âvâdan ben mezbûr Aleksandra’nın zimmetini ibrâ ve iskāt eyledim, ol dahi bedel-i sulhe ve gayra müte‘allika da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Abdullah Çelebi b. Ahmed, Mehmed Ağa b. Abdullah, Osman b. Ömer, Ebûbekir b. Mahmud.