İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 451 Hüküm no: 478 Orijinal metin no: [128a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın kızı ve vârisi Hanbeyi’nin el-Hâc Mahmud’daki alacağının tahsili Fi’l-asl vilâyet-i Anadolu’da Eğin kazâsına tâbi‘ Torullu nâm karye ahâlîsinden olup mahmiye-i İstanbul’da Aksaray kurbunda Abdullah Ağa mahallesinde tavattun ettiğinden sonra vefât eden Mehmed Beşe b. Abdullah nâm kimesnenin verâseti, zevce-i metrûkeleri Belkıs bt. Abdullah ve Safiye nâm hâtunlar ile sulbî kebîr oğlu el-Hâc Mahmud’a ve sulbiye kebîre kızı Hanbeyi nâm hâtuna münhasıra olduğu şer‘an sâbit oldukdan sonra mezbûre Hanbeyi’nin zevci ve tarafından husûs-ı âti’l-beyâna vekîli olup âharı dahi tevkîle me’zûn olduğu hasm-ı câhid-i şer‘î olan karındaşı mezbûr el-Hâc Mahmud muvâcehesinde, kazâ-i mezbûr ahâlîsinden olup mahmiye-i mezbûrda Kızıltaş mahallesi sâkinlerinden olan mezbûre Hanbeyi’nin zâtını ma‘rifet-i şer‘iyye ile ârifân Ahmed Bey b. Mehmed nâm kimesne husûs-ı âti’l-beyâna vekîl ettikde, vekâlet-i mezbûreyi kabûl eden fahrü’l-akrân el-Hâc Abdurrahman Ağa b. Osman nâm kimesne meclis-i [128b] şer‘-i şerîfde müteveffâ-yı mezbûr Mehmed Beşe’nin terekesine vâzı‘ü’l-yed olan mezbûr el-Hâc Mahmud mahzarında üzerine da‘vâ ve takrîr-i kelâm edip mezbûr el-Hâc Mahmud babası müteveffâ-yı mezbûrun terekesinden Bezzâzistân’da mahfûz olan malından bir def‘a makbûzu olan iki bin guruşdan müvekkilem mezbûre Hanbeyi’nin hissesini sâbıkan vekîli olduğu sâbit olan Ahmed Bey’e def‘ ve teslîm ol dahi ahz u kabz etmiş idi lâkin mezbûr el-Hâc Mahmud babası müteveffâ-yı mezbûrun terekesinden bir def‘a dahi her kesesi beş yüz esedî guruş olup yirmi beş kese esedî guruş olmak üzre makbûzu olan on iki bin beş yüz esedî guruşdan müvekkilem mezbûre Hanbeyi’nin hisse-i şer‘iyyesi olan üç bin altı yüz kırk beş guruş ile yüz akçemi bana teslîme mezbûr el-Hâc Mahmud’a tenbîh olmak matlûbumdur dedikde gıbbe’s-suâl mezbûr el-Hâc Mahmud cevâbında kaziyye minvâl-i muharrer üzre olup babası müteveffâ-yı mezbûrun terekesinden Bezzâzistân’da mahfûz olan iki bin guruşdan mâ‘adâ her kesesi beş yüz esedî guruş olup yirmi beş kese esedî guruş olmak üzre on iki bin beş yüz esedî guruşu ahz u kabz ettiğini bi tav‘ihî ikrâr ve i‘tirâf etmeğin alâ mûceb-i i‘tirâfihî meblağ-ı mezbûr on iki bin beş yüz esedî guruşdan müvekkile-i mezbûre Hanbeyi’nin hisse-i şer‘iyyesi olan üç bin altı yüz kırk beş esedî guruş ile yüz akçeyi müdde‘î-i mezbûr el-Hâc Abdurrahman Ağa’ya def‘ ve teslîme mezbûr el-Hâc Mahmud’a tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilâhir li sene seb‘a ve semânîn ve elf. Şuhûdü’l-hâl: Fahrü’l-müderrisînü’l-kirâm Burhanzâde İbrahim Efendi, fahrü’l-eimme Mahmud Efendi b. Muharrem sâkin-i mahalle-i Cafer Ağa, Fahrü’l-akrân Yusuf Odabaşı 27 c[emâ‘at], Ali Beşe b. Mustafa, el-Hâc Kemaleddin Çelebi, Ali Bey b. Osman, Ahmed Halîfe b. el-Hâc Ahmed, Bektaş Bey b. Mehmed ve gayruhüm.