İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 453 Hüküm no: 479 Orijinal metin no: [128b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mevlüd’ün kocası Mehmed b. Ahmed’den muhâla‘a yoluyla boşandığı Mahmiye-i İstanbul’da Debbâğ Yunus mahallesinde sâkine olup zâtı ma‘rifet-i şer‘iyye ile ârifân Mustafa b. Osman ve Mehmed b. Halil nâm kimesneler ta‘rîfleriyle mu‘arrefe olan Ayşe bt. Mevlüd nâm hâtun meclis-i şer‘-i şerîfde zevc-i dâhili bâ‘is-i hâze’l-kitâb Mehmed b. Ahmed mahzarında ikrâr ve takrîr-i kelâm edip zevcim mezbûr Mehmed zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i ma‘lûmem üzerlerine ve me‘ûnet-i süknâm dahi kendi üzerime olmak üzre, zevcim mezbûr Mehmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl eyledikden sonra hukūk-ı zevciyyete müte‘allika âmme-i de‘âvâdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min şehri Rebî‘ilâhir li sene seb‘a ve semânîn ve elf. [129a] [Şuhûdü’l-hâl]: Mehmed Çelebi b. İsmail, el-Hâc Mustafa b. Mehmed, Hasan b. Mustafa, Muharrem b. Şaban, Hasan Çelebi b. Ahmed.