İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 453 Hüküm no: 480 Orijinal metin no: [129a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Dilaver’in kocası es-Seyyid Ahmed b. es-Seyyid Mustafa’dan muhâla‘a yoluyla boşandığı Mahmiye-i İstanbul’da Nişâncı Paşa-yı Atîk mahallesinde sâkine olup zâtı ma‘rifet-i şer‘iyye ile ârifân babası Dilaver b. Abdullah ve es-Seyyid Osman Efendi nâm kimesneler ta‘rîfleriyle mu‘arrefe olan Râbia bt. Dilaver nâm hâtun meclis-i şer‘-i şerîfde zevc-i dâhili bâ‘is-i hâzihi’l-vesîka es-Seyyid Ahmed b. es-Seyyid Mustafa nâm kimesne mahzarında ikrâr ve takrîr-i kelâm edip zevcim mezbûr zimmetinde mütekarrir ve ma‘kūdun-aleyh olan üç bin beş yüz akçe mehr-i müeccelim ve nafaka-i iddet-i ma‘lûmem üzerlerine ve me‘ûnet-i süknâm dahi kendi üzerime olmak üzre mezbûr es-Seyyid Ahmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allika cemî‘ de‘âvî ve mütâlebâtdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mehmed Efendi b. Mehmed, İbrahim Çelebi b. Ahmed, Veli Beşe el-Muhzır, Ali Çelebi b. ( ), es-Seyyid Osman b. ( ).