İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 454 Hüküm no: 481 Orijinal metin no: [129a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Abdullah’ın Mehmed Çavuş b. Abdullah’a olan borcunun Ali Bey b. Mustafa’ya havale edildiği Dergâh-ı âlî çavuşlarından olup Ali Paşalı demekle ma‘rûf Mehmed Çavuş b. Abdullah nâm kimesne tarafından husûs-ı âti’l-beyâna vekîl olduğu es-Seyyid İbrahim Çavuş b. Mehmed ve Mustafa Bey b. Ebûbekir nâm kimesneler şehâdetleriyle şer‘an sâbit olan Osman Çavuş b. İsmail nâm kimesne meclis-i şer‘-i şerîfde bâ‘is-i hâze’l-kitâb Mehmed Beşe b. Abdullah nâm kimesne mahzarında ikrâr ve takrîr-i kelâm edip bundan akdem müvekkilim merkūm Mehmed Çavuş gāib ani’l-meclis Musa Bey b. Abdülmümin nâm kimesne zimmetinde cihet-i deyn-i şer‘îden beş bin guruş hakkı olmağla meblağ-ı mezbûra mezbûr Mehmed Beşe ile gāibûn ani’l-meclis Ali Efendi ve Ahmed Çelebi ve Süleyman Ağa nâm kimesneler ve Avanos ve Melkon nâm zimmîler ber vech-i iştirâk kefîl olduklarından sonra müvekkil-i mezbûr Mehmed Çavuş kefâlet-i mezbûreye binâen meblağ-ı mezbûrdan mezbûr Mehmed Beşe’nin hissesine isâbet edip üzerine edâsı lâzım gelen sekiz yüz otuz üç guruşu lâhık oldukdan sonra meblağ-ı mezbûrun beş yüz seksen üç guruşunu mezbûr Mehmed Beşe yedinden ahz u kabz edip iki yüz elli guruşu bâkī kalmış idi hâlâ mezbûr Mehmed Beşe meblağ-ı bâkī-i mezbûr iki yüz elli guruş için müvekkilim mezbûr Mehmed Çavuş işbu hâzır bi’l-meclis es-Seyyid Ali Bey b. Mustafa nâm kimesne üzerine cümlesi bir meclisde iken rızâlarıyla havâle-i sahîha-i şer‘iyye ile havâle edip müvekkil-i mezbûr Mehmed Çavuş ile es-Seyyid Ali Bey havâle-i mezbûreyi kabûl etmekle meblağ-ı bâkī-i mezbûrdan mezbûr Mehmed Beşe’nin zimmetini berî olup min ba‘d kefâlet-i mezbûreye binâen müvekkilim mezbûr Mehmed Çavuş’un mezbûr Mehmed Beşe’de hakkı ve alâkası kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mefharü’l-(…) Mehmed b. (…), es-Seyyid Ahmed Ağa b. Mehmed Çavuş, es-Seyyid Ahmed Serbölük, Mehmed Beşe b. Hüseyin ve gayruhüm.