İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 454 Hüküm no: 482 Orijinal metin no: [129b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Tağtar’ın vârislerinin Toma v. Simyon’daki para ve eşyaları aldıkları Vilâyet-i Anadolu’da Trabzon sancağında Akçaâbad nâhiyesine tâbi‘ Visera nâm karye ahâlîsinden olup mahmiye-i İstanbul’da Çukurçeşme kurbunda ( ) mahallesinde sâkin iken bundan akdem hâlik olan Dimitri v. Tağtar nâm zimmînin verâseti zevcesi Rosine bt. Yanola nâm Nasrâniyye ile oğlu Mosi nâm sagīre ve sulbiye kızları Mande ve Rakasne ve Alasol nâm sagīrelere münhasıra olduğu şer‘an mütehakkik oldukdan sonra mezbûre Rosine tarafından husûs-ı âti’l-beyâna vekîli olup ve sıgār-ı mezbûrûnun tesviye-i umûruna kıbel-i şer‘den mansûb vasîleri olduğu nehc-i şer‘î ve tarîk-i mer‘î üzre şer‘an sâbit olan Zateli v. Efendol zimmî meclis-i şer‘-i şerîfde hâlik-i mezbûrun ber mûceb-i defter-i kassâm terekesine vâzı‘ü’l-yed olan bâ‘is-i hâze’s-sifr Toma v. Simyon nâm zimmî muvâcehesinde vekâleten [ve] vesâyeten ikrâr ve takrîr-i kelâm edip mezbûr Toma’nın hâlik-i merkūmun muhallefâtından alâ mûcebi ikrârihî makbûzu olan üç bin nakid akçe ve mecmû‘u bin akçe kıymetli beynimizde ma‘lûm eşyâsını mezbûr Toma yedinden vekâleten ve vesâyeten tamâmen ahz u kabz eyledim ba‘de’l-yevm meblağ-ı mezbûr üç bin akçeden ve eşyâ-i mezbûreden merkūm Toma yedinde bir şey bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ömer b. Abdülkerim, İlyas Beşe, Receb Beşe, el-Hâc Süleyman, Mehmed Çelebi, Yahya Çelebi bâzirgân, Ahmed Çelebi ve gayruhüm.