İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 455 Hüküm no: 483 Orijinal metin no: [129b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Yani v. Todori’nin İstati v. Papa Zopoli’deki alacağının tahsil edildiği Fi’l-asl vilâyet-i Rumeli’nde Kalavrete kazâsına tâbi‘ Kerpi nâm karye ahâlîsinden olup mahmiye-i İstanbul’da bakkal iken bundan akdem hâlik olan Yani v. Todori nâm zimmînin verâseti, zevce-i metrûkesi Betorye bt. Feranci nâm Nasrâniyye ile sulbî sagīr oğlu Yorgi’ye münhasıra olduğu şer‘an mütehakkik oldukdan sonra mezbûre Betorye’nin li ebeveyn karındaşı Aleksi nâm zimmî mezbûrenin tarafından husûs-ı âti’l-beyâna vekîl olduğu yedinde olan mazmûnu müsbit hüccet-i şer‘iyye ile sâbit olmağla vekâleten ve sagīr-i mezbûrun tesviye-i umûruna kıbel-i şer‘den mansûb vasîsi olmağla vesâyeten meclis-i şer‘-i şerîf-i enverde bâ‘isü’s-sifr İspeloti v. İstati nâm zimmî muvâcehesinde ikrâr ve takrîr-i kelâm edip hâlik-i mezbûr Yani hayâtında mezbûr İspeloti’nin müvekkili ve şerîki olup Lütfi Paşa sûkunda Hüseyin Efendi dükkânında bakkal olan İstati v. Papa Zopoli nâm zimmîye alâ tarîki’l-mudârebe on bin akçe def‘ ve teslîm ol dahi ahz u kabz ettiğinden sonra mezbûr Yani meblağ-ı mezbûr on bin akçeyi kable’l-ahz hâlik olmağla vekîl-i mezbûr İspeloti meblağ-ı mezbûr on bin akçeyi müvekkil-i mezbûr İstati’nin malından bana def‘ ve teslîm ben dahi vekâlet ve vesâyetim hasebiyle yedinden tamâmen ahz u kabz eyledim ba‘de’l-yevm hâlik-i mezbûrun merkūm İstati yedinde olan meblağ-ı mezbûr on bin [130a] akçeden bir akçe ve bir habbe bâkī kalmadı dedikden sonra yine mezbûr Aleksi meclis-i şer‘de mezbûr İspeloti muvâcehesinde i‘âde-i kelâm edip eğer müvekkil-i mezbûr İstati meblağ-ı mezbûr on bin akçeyi mezbûr İspeloti’nin bana def‘ ve teslîmine râzı olmayıp, kendiden taleb ve da‘vâ edip hükm-i şer‘î lâhık olup ahz ederse meblağ-ı mezbûra ben emir ve kabûlü hâviye kefâlet-i şer‘iyye ile kefîl oldum dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-râbi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Mustafa b. Tevekkül, İsmail b. Mehmed, Osman b. Ömer, Mehmed b. Abdullah, Velisa? v. Anton, Nikola v. Sakman.