İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 459 Hüküm no: 485 Orijinal metin no: [131a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Emine bt. es-Seyyid Abdi’nin evini Mehmed Çelebi b. Mustafa’ya bey‘ bi’l-istiğlâl yoluyla sattığı Mahmiye-i İstanbul’da Akseki mahallesi sâkinelerinden olup zâtı ma‘rifet-i şer‘iyye ile Mehmed Çelebi b. Abdullah ve İbrahim Çelebi b. Mehmed nâm kimesneler ta‘rîfleriyle mu‘arrefe olan Şerife Emine bt. es-Seyyid Abdi nâm hâtun meclis-i şer‘-i şerîf-i lâzımü’t-teşrîfde, merhûm el-Hâc Ahmed vakfına hâlâ mütevellî olan bâ‘is-i hâze’l-kitâb Mehmed Çelebi b. Mustafa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan el-Hâc Mehmed menzili ve bir tarafdan ço[r]bacı ( ) Ağa mülkü ve iki tarafdan tarîk-i âm ile mahdûd dâhiliyyesinde üç bâb oda ve bir sofa ve hâriciyyesinde iki bâb oda ve bir sofa ve havluyu müştemil menzilimi mütevellî-i mezbûr Mehmed Çelebi’ye yüz esedî guruşa bi tarîki’l-istiğlâl bey‘ ve teslîm ol dahi ba‘de’l-iştirâ ve’t-tesellüm semen-i mezbûru yedinde olan mâl-ı vakf-ı mezbûrdan bana edâ ve teslîm ben dahi ahz u kabz ettiğimden sonra mütevellî-i mezbûr Mehmed Çelebi menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan üç sene tamâmına değin senede on beş guruşa olmak üzre kırk beş guruşa bana îcâr ve teslîm ben dahi istîcâr ve tesellüm eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Mustafa b. İshak, Mehmed Bey b. Abdullah, Yusuf Efendi el-İmâm, Mehmed Çelebi b. Abdullah, İbrahim Çelebi b. Ahmed ve gayruhüm.