İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 460 Hüküm no: 486 Orijinal metin no: [131a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdi’nin evini el-Hâc Mustafa b. Halil’e sattığı Mahmiye-i İstanbul’da Debbâğzâde mahallesi sâkinelerinden olup zâtı ma‘rifet-i şer‘iyye ile ârifân ammisi Receb Çorbacı b. Mustafa ve el-Hâc Mustafa b. Hüseyin nâm kimesneler ta‘rîfleriyle mu‘arrefe olan Sâliha bt. Abdi nâm hâtun meclis-i şer‘-i şerîf-i enverde bâ‘is-i hâze’l-kitâb el-Hâc Mustafa b. Halil nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup mahalle-i mezbûrede vâki‘ bir tarafdan bakkalzâde odaları ve bir tarafdan kebabçı Usta Mehmed mülkü ve bir tarafdan Abdullah Efendi menzili ve bir tarafdan tarîk-i âm ile mahdûd fevkānî bir bâb oda ve bir sofa ve bir matbah ve tahtânî iki bâb oda ve bir sofa ve bahçeyi ve su kuyusunu ve kenîfi müştemil menzilimi, bi cümleti’t-tevâbi‘ ve’l-levâhık üç yüz altmış esedî guruşa mezbûr el-Hâc Mustafa’ya bey‘-i kat‘î ile bey‘ ve teslîm ol dahi ba‘de’l-iştirâ ve’t-tesellüm semen-i mezbûr üç yüz altmış guruşu bana edâ ve teslîm ben dahi kabz ve tesellüm eyledim ba‘de’l-yevm menzil-i mahdûd-ı mezbûr merkūm el-Hâc Mustafa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: Börekçibaşı Ali Beşe b. Nasûh, Ali Beşe b. Bâli, Kadızâde el-Hâc İsmail b. Hasan, Receb Beşe b. Mustafa, Hasan b. Receb, Ömer Çelebi Mumcu, Ebûbekir Efendi ve gayruhüm.