İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 460 Hüküm no: 487 Orijinal metin no: [131a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Osman’ın çitlik, ev arsası ve değirmenini Mustafa Efendi b. Muharrem Efendi’ye sattığı Dârü’l-hilâfeti’l-aliyye Kostantıniyye el-mahmiye’de Sinan Ağa mahallesi sâkinlerinden olup sâbıkan Şâm-ı dârü’s-selam kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm Abdülbâkī Efendi b. el-merhûm Ali tarafından [131b] husûs-ı âti’l-beyâna vekîl olduğu Şeyh Mehmed Efendi b. Şeyh Mehmed [ve] Ömer Bey Efendi el-Hâc Derviş nâm kimesneler şehâdetleriyle şer‘an sâbite olan kethüdâsı fahrü’l-akrân Ahmed Çelebi b. Osman meclis-i şer‘-i şerîf ve mahfil-i dîn-i münîfde, mefharü’l-kuzât sâhib-i hâze’l-kitâb Mustafa Efendi b. Muharrem Efendi mahzarında bi’l-vekâle ikrâr ve takrîr-i kelâm edip müvekkilim mûmâ-ileyh Abdülbâkī yedinde mülk olup vilâyet-i Anadolu’da medîne-i Kastamonu kurbunda Budamiç nâm karyede vâki‘ bir tarafdan Mustafa b. Hoca Mehmed ve bir tarafdan Ahmed b. el-Hâc Mustafa ve bir tarafdan ba‘zan el-Hâc Osman b. İbrahim ve ba‘zan Hasan b. el-Hâc İsmail mülkleri ve bir tarafdan tarîk-i âm ile mahdûd fevkānî bir beyt ve bir sofa ve bir anbar ve tahtânî bir ahır ve bir samanhâne ve bahçeyi müştemil çiftlik ta‘bîr olunur menzilini ve menzil-i mezbûrun etrâfında mevâzi‘-i müte‘addidede vâki‘ lede’l-ahâlî ve’l-cîrân ma‘lûmü’l-hudûd ve’l-kıt‘a menzil arsalarını ve menzil-i mezbûrun taraf-ı garbında vâki‘ iki göz su değirmenini cümle tevâbi‘ ve levâhıklarıyla zikri âtî arâzide zirâ‘at olunup hâlâ müntefe‘un-bih olan beynimizde ma‘lûm hasâdı bi safkatin vâhidetin merkūm Mustafa Efendi’ye altı yüz esedî guruşa bey‘-i kat‘î ile bey‘ ve temlîk ve taht-ı yedinde ve havza-i tasarrufunda olup çiftlik-i mezkûra teba‘iyyet ile zirâ‘at olunur karye-i mezbûre sınırı dâhilinde mevâzi‘-i müte‘addidede vâki‘ lede’l-ahâlî ve’l-cîrân ma‘lûmü’l-hudûd ve’l-kıt‘a üzerlerini câbecâ eşcârı olan çayır ve arâzi ve cebeli ma‘rifet-i sâhib-i arz ile dört yüz guruş bedel mukābelesinde ferâğ ve tefvîz edip merkūm Mustafa Efendi dahi iştirâ ve temellük ve tefevvüz ve kabûl ettiğinden sonra semen-i mezbûr altı yüz guruş ve bedel-i merkūm dört yüz guruş cem‘an bin guruş üç yüz guruşunu müvekkil-i mûmâ-ileyh Abdülbâkī Efendi’ye edâ ve teslîm ol dahi ahz u kabz edip bâkī yedi yüz guruşu târih-i kitâbdan bir sene tamâmına değin te’cîl ettiğinden sonra zikr olunan çiftlik ve menzil bedelleri ve değirmeni ve hasâdı ve çayırı ve arâzi ve cebeli mahallerinde zabt ve tasarrufa merkūm Mustafa Efendi’yi taslît eyledi dedikde merkūm Mustafa Efendi mukırr-ı merkūm Ahmed Çelebi’yi cemî‘ kelimâtında tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mefharü’l-müderrisînü’l-kirâm Musa Efendi, fahrü’l-kuzât Mustafa Efendi eş-şehîr Buhurzâde?, fahrü’l-kuzât Mustafa b. Nasûh Efendi, fahrü’l-kuzât el-Hâc İbrahim Efendi, fahrü’l-kuzât Ali Efendi Bâli, fahrü’l-kuzât Derviş Efendi.