İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 462 Hüküm no: 489 Orijinal metin no: [131a(2)-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın Muslu b. Safa’dan boşandığı Mahmiye-i İstanbul’da Beyceğiz mahallesinde sâkine olup zâtı ma‘rifet-i şer‘iyye ile ârifân eş-Şeyh Abdurrahman Efendi b. Ömer ve Yusuf Efendi b. Bekir nâm kimesneler ta‘rîfleriyle şer‘an mu‘arrefe olan Ayşe bt. Abdullah nâm hâtun meclis-i şer‘-i şerîf-i lâzımü’t-teşrîfde, zevc-i dâhili bâ‘is-i hâze’l-kitâb Muslu b. Safa nâm kimesne mahzarında ikrâr ve takrîr-i kelâm edip zevcim mezbûr Muslu zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i ma‘lûmem üzerlerine ve me‘ûnet-i süknâm dahi kendi üzerime olmak üzre mezbûr Muslu ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete ve sâir hukūk-ı ma‘lûme ve mechûle müte‘allika âmme-i de‘âvâ[da]n her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilâhir li sene seb‘a ve semânîn ve elf. Şuhûdü’l-hâl: eş-Şeyh Abdurrahman Efendi b. Ömer, Yusuf Efendi b. Bekir, Ali b. Küçük, Mehmed Çelebi b. Mustafa, Abdurrahman Efendi b. ( ), İbrahim Çelebi b. Emrullah?.