İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 462 Hüküm no: 490 Orijinal metin no: [131a(2)-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mehmed Çelebi b. Murad’ın vârislerinin vasîsi olan el-Hâc Hasan’dan olan alacağı hususunda anlaşma sağlandığı Mahmiye-i İstanbul’da Debbâğzâde mahallesinde sâkin iken bundan akdem fevt olan Mehmed Çelebi b. Murad’ın li ebeveyn ammi oğulları Hasan ve Mirşah ibney Hamîd nâm kimesnelere münhasıra olduğu şer‘an zâhir ve müte‘ayyin oldukdan sonra mezbûr Mirşah meclis-i şer‘-i şerîfde sagīr-i mezbûrun hayâtında kıbel-i şer‘den mansûb vasîsi olan el-Hâc Hasan Bey b. Kalender mahzarında ikrâr ve takrîr-i kelâm edip mezbûr el-Hâc Hasan Bey sagīr-i mezbûrun terekesinden ber mûceb-i defter-i kassâm makbûzu olan on dört bin akçenin on üç bin akçesini bana def‘ ve teslîm ben dahi yedinden ahz u kabz edip bâkī bin akçesi yedinde kalmış idi hâlâ meblağ-ı bâkī-i mezbûru dahi mezbûr el-Hâc Hasan Bey’den taleb ve da‘vâ eylediğimde, mezbûr el-Hâc Hasan Bey dahi meblağ-ı mezbûru bi’t-tamâm sana def‘ ve teslîm etmiş idim demekle beynimizde münâza‘ât-ı kesîre vâki‘ olmuş idi el-hâletü hâzihî muslihûn tavassut edip meblağ-ı bâkī-i mezbûr bin akçe da‘vâsından mezbûr el-Hâc Hasan Bey ile beynimizde altı yüz akçe üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr altı yüz akçeyi mezbûr el-Hâc Hasan Bey yedinden tamâmen alıp kabz edip bâkī dört yüz akçe da‘vâsından ve tereke-i müteveffâ-yı mezbûra müte‘allika cemî‘ da‘vâdan mezbûr el-Hâc Hasan Bey’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Çelebi b. Mustafa, Ali Efendi b. Veli el-Müezzin, İbrahim Çelebi b. Müstedâm, Pîr Mehmed Efendi b. Mehmed, Ramazan Beşe b. Mahmud, Hüseyin Beşe b. Mehmed, el-Hâc Şaban b. Hasan, Mustafa Çelebi b. Hüseyin, Hasan Beşe b. Himmet, Ebûbekir b. Hüseyin, Süleyman Çelebi b. Himmet, mumcu Mehmed Çelebi b. Abdullah ve gayruhüm mine’l-hâzırîn.