İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 463 Hüküm no: 491 Orijinal metin no: [131b(2)-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çorlulu Yorgo v. Karyos’un bağını Osman Beşe’ye sattığı Çorlu kazâsında kasaba-i Çorlu sâkinlerinden Yorgo v. Karyos nâm zimmî mahfil-i kazâda, kasaba-i mezbûre sâkinlerinden bâ‘is-i hâze’l-kitâb Osman b. Halil nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkünde olup kasaba-i mezbûrede vâki‘ bir tarafı Hüseyin Çelebi oğlu bağı ve bir tarafı tarîk-i âm ve bir tarafı Erdebilîzâde demekle meşhûr kimesnenin tarlası ve bir tarafı kuyumcu Yakomi nâm zimmî bağı ile mahdûd mülk bağımı, mezbûr Osman Beşe’ye yedi bin nakd-i râyic fi’l-vakt fıddî akçeye bi safkatin vâhidetin bey‘ ve semeni olan meblağ-ı mezbûr yedi bin akçeyi mezbûr Osman Beşe yedinden bi’t-tamâm ahz u kabz ettim ba‘de’l-yevm bağ-ı mahdûd-ı [132a] mezkûr, mezbûr Osman Beşe’nin mülk-i müşterâsıdır, keyfe mâ yeşâ’ ve hasbemâ yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min şehri Rebî‘ilâhir li sene seb‘a ve semânîn ve elf. Şuhûdü’l-hâl: Pîr Ali b. Süleyman, Mustafa Ağa kethüdâ-yı berber sâbıkan bi Çorlu, serdar Ahmed Çelebi hâlâ, İbrahim Çelebi b. Mehmed.