İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 464 Hüküm no: 492 Orijinal metin no: [133a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Efendi b. Zeynullah’ın bağını Atâullah Efendi b. Osman’a vefâen sattığı Husûs-ı âti’l-beyânın mahallinde tahrîri iltimâs olunmağın kıbel-i şerî‘at-ı mezbûreden irsâl olunan Mevlânâ Hüseyin Efendi b. Ahmed Efendi sâbıkan Edirne kadısı oldukdan sonra vefât eden merhûm Velizâde Ahmed Efendi’nin veresesi mahmiye-i İstanbul’da Kirmasti mahallesinde sâkin oldukları menzile varıp zeyl-i kitâbda mastûrü’l-esâmî olan müslimîn huzûrunda akd-i meclis-i şer‘ ettikde, vilâyet-i Anadolu’da Bor kasabası sâkinlerinden fahrü’l-kuzât İbrahim Efendi b. Zeynullah nâm kimesne meclis-i ma‘kūd-ı mezbûrda merhûm-ı mezbûrun evlâd-ı sıgārının vasiyy-i muhtârları olan bâ‘is-i hâze’l-kitâb Atâullâh Efendi b. Osman mahzarında ikrâr ve takrîr-i kelâm edip mâl-ı sıgār-ı mezbûrûndan merkūm Atâullâh Efendi yedinden istidâne ve kabz eylediğim yüz yirmi guruş ve semeni târih-i kitâbdan bir sene tamâmına değin müeccel olmak üzre iştirâ ve kabz eylediğim beynimizde ma‘lûme emti‘a-i mütenevvi‘a bahâlarından otuz guruş, cem‘an sıgār-ı mezbûrûna deynim olan yüz elli guruş mukābelesinde kasaba-i mezbûreye tâbi‘ Abagöz nâm karyede vâki‘ bir tarafı Süleyman Efendizâde Hasan Efendi mülkü ve bir tarafı el-Hâc Ahmed mülkü ve bir tarafdan Sefer Dede oğlu mülkü ve bir tarafı tarîk-i âma müntehî mülk bağımı, bey‘ bi’l-vefâ ile bey‘ ol dahi iştirâ ve kabûl edip zikr olunan bağı mahallinde zabta merkūm Atâullâh Efendi taslît eyledi dedikde gıbbe’t-tasdîki’ş-şer‘î hâlâ Aksaray Beyi olan fahrü’l-akrân Mehmed Bey b. el-merhûm Hüseyin ve yine kasaba-i mezbûre sükkânından Ramazan Bey b. Yusuf nâm kimesneler meblağ-ı mezbûra tarafeynden emir ve kabûlü hâviye kefâlet ile kefîl olduklarından sonra merkūm İbrahim Efendi meclis-i ma‘kūd-ı merkūmda i‘âde-i kelâm edip ecl-i mezbûr hulûlünde meblağ-ı mezbûru edâ müyesser olmayıp zimmetimde kalırsa zikr olunan bağı bey‘ ve kabz-ı semene ve semeninden meblağ-ı mezbûru merkūm Atâullâh Efendi’ye edâya fazlasını bana îsâle bey‘ ve kabz ve îsâl mütevakkıf olduğu umûrun küllîsine tarafımdan küllemâ azeltüke fe-ente vekîli mazmûnu üzre azil ve in‘izâlden masûne vekâlet-i devriyye ile vekîl eyledim dedikde mezbûrân Mehmed Bey ve Ramazan Bey vekâlet-i mezkûreyi kabûl ve merâsimini edâya müte‘ahhid olmağın husûs-ı mezkûru Mevlânâ-yı merkūm mahallinde tahrîr ba‘dehu ma‘an irsâl olunan ( ) ile mahall-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. [Fi’l-yevmi’l-âşir min şehri Rebî‘ilâhir li sene seb‘a ve semânîn ve elf]. Şuhûdü’l-hâl: İbrahim Efendi b. Hasan Efendi Borlu, Abdülganî b. Abdülgaffâr Efendi, el-Hâc Hasan b. Şaban, Abdurrahman Efendi b. Abdülfettâh, Hüseyin Çelebi b. Ebûbekir.