İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 465 Hüküm no: 493 Orijinal metin no: [132b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Peynirci Mehmed Beşe b. Bâli’nin Mehmed Beşe b. Ahmed’e verdiği koyunların iadesi Medîne-i Ebâ Eyyûb-i Ensârî’de Nâzperver mahallesi sâkinlerinden bâ‘is-i hâze’l-kitâb Peynirci Mehmed Beşe b. Bâli nâm kimesne meclis-i şer‘îde, medîne-i mezbûre müzâfâtından Çekmece-i Kebîr nâhiyesine tâbi‘ Çakmaklı nâm karye ahâlîsinden Peynirci diğer Mehmed Beşe b. Ahmed nâm kimesne mahzarında üzerine da‘vâ ve takrîr-i kelâm edip karye-i mezbûre sınırı dâhilinde vâki‘ yaylakta hâlâ ra’y olunan iki yüz doksan sekiz re’s sağmalı koyunlarını târih-i kitâbdan bir ay mukaddem âhara [bey‘] ediver deyû? mezbûr diğer Mehmed Beşe’yi tarafından vekîl edip ve zikr olunan koyunları mezbûr diğer Mehmed Beşe’ye teslîm ol dahi ba‘de’l-kabûli’l-vekâle kabz ve tesellüm etmiş idi hâlâ mezbûr diğer Mehmed Beşe’yi vekâlet-i mezbûrdan azl edip zikr olunan koyunlarından hâlâ mevcûd olmağla mezbûr diğer Mehmed Beşe’ye suâl olunup zikr olunan iki yüz doksan sekiz [re’s] koyunları bana mahallinde teslîme tenbîh olunmak matlûbumdur dedikde gıbbe’s-suâl mezbûr diğer Mehmed Beşe cevâbında müdde‘î-i mezbûr fâriğ-i mezbûrdan zikr olunan koyunlarını ber vech-i muharrer bey‘ eyle deyû beni vekîl edip bana teslîm ben dahi ba‘de’l-kabûli’l-vekâle kabz ve tesellüm eylediğimden sonra zikr olunan koyunların her birini yüz kırk altışar akçeye gāibûn ani’l-meclis Ömer nâm kimesneye ve Yorgi ve Peltik? nâm zimmîlere bey‘ ve teslîm anlar dahi iştirâ ve tesellüm ettiklerinden sonra semenleri olan cem‘an kırk üç bin beş yüz sekiz akçeyi kabz eyledim, hâlâ zikr olunan iki yüz doksan sekiz re’s koyun yedinde mevcûd değildir deyicek mezbûr diğer Mehmed Beşe husûs-ı mezbûra yemîn ile müsaddak olmağın mezbûr diğer Mehmed Beşe’ye zikr olunan iki yüz doksan sekiz re’s koyunları vekâlet-i mahkiyesi hasebiyle bundan akdem mezbûr Ömer ve Yorgi ve Peltik’e bey‘ ve teslîm edip hâlâ yedinde mevcûd olmadığına yemîn teklîf olundukda ol dahi yemînden nükûl etmeğin mûcebince zikr olunan iki yüz doksan sekiz re’s koyunları müdde‘î-i mezbûra mahallinde teslîme merkūm diğer Mehmed Beşe’ye tenbîh olunmağın mâ hüve’l-vâki‘ bi’l-ibtigā? ketb ve imlâ olundu. Fi’l-yevmi’t-tâsi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: Sâlih Beşe b. Ahmed Beş el-Mübâşir, Bayram b. Hasan el-Mübâşir, Mehmed Çavuş, Mehmed Çelebi b. Ebûbekir, Çekmece-i kebîr, Hasan Çelebi el-Muhzır, Mehmed Çelebi b. Abdülmennân, Süleyman Çelebi [b.] Yusuf Beşe, İbrahim Çelebi b. ( ) Mehmed el-Muhzır, Ahmed Beşe [b.] Mustafa el-Muhzır ve gayruhüm mine’l-hâzırîn.