İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 466 Hüküm no: 494 Orijinal metin no: [133a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Efendi b. Mustafa’nın evini İbrahim Çelebi b. Halil Efendi’ye sattığı Mahmiye-i İstanbul’da Harâccı Muhyiddin mahallesi sâkinlerinden Hasan Efendi b. Mustafa nâm kimesne meclis-i şer‘-i şerîfde bâ‘is-i hâze’l-kitâb İbrahim Çelebi b. Halil Efendi nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrda vâki‘ ve bir tarafdan Kîsedâr Ali Efendi mülkü ve bir tarafdan merhûm İbrahim Çelebi vârisleri mülkleri ve bir tarafdan tarîk-i hâs ve bir tarafdan tarîk-i âm ile mahdûd fevkānî iki bâb oda ve bir matbah ve bir tahtapûş ve bir kenîfi müştemil olup arsasının senede Hâcegî câmi‘-i şerîfi vakfına üç yüz altmış akçe mukāta‘a-i kadîmden olan menzilimi, cümle tevâbi‘ ve levâhıkı ve kâffe-i hukūk ve merâfıkı ile mezbûr İbrahim Çelebi’ye tarafeynden îcâb ve kabûlü hâvî şurût-ı müfside[den] ârî bey‘-i bâtt-ı sahîh-i şer‘î ile iki yüz esedî guruşa bey‘ ve teslîm ol dahi iştirâ ve tesellüm ve kabz eylediğinden sonra semeni olan meblağ-ı mezbûr iki yüz esedî guruşu yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūm İbrahim Çelebi’nin mülk-i müşterâsıdır, keyfe mâ yeşâ’ ve yahtâ[r] mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: es-Seyyid İbrahim Ağa b. es-Seyyid Emrullah, Fahrü’l-kuzât Ahmed Efendi b. Mustafa, Ahmed Çelebi b. Ramazan, Mustafa Çelebi b. Mahmud Efendi, Mustafa Çelebi b. Yusuf ve gayruhüm.